TUZINGATIE LISHE BORA NA MAZOEZI KUJIKINGA NA MAGONJWA YASIYOAMBUKIZA

Posted on: October 14th, 2020

Hayo yamesemwa leo Oktoba 14,2020 na Katibu Tawala Wilaya ya Bagamoyo Bi. Kasilda Mgeni, katika maadhimisho ya Kumbukizi ya Miaka 21 ya kifo cha Baba wa Taifa Mwl. Julius K. Nyerere yaliyofanyika katika Uwanja wa Shule ya Msingi Majengo kwa Wananchi kupatatiwa elimu juu ya magonjwa yasiyoambukiza, vipimo na matibabu bure.

Akizungumza katika kumbukizi hiyo Bi. Kasilda amesema ni Baba wa Taifa, Hayati Mwl. Julius K. Nyerere enzi za uhai wake alisisitiza Wananchi kupiga vita Ujinga, Umaskini na Maradhi na katika kumuenzi na kuishi falsafa yake hiyo Halmashauri imeamua kumkumbuka katika siku hii muhimu ya kumbukizi ya kifo chake kwa Wataalam wa Afya kutoa elimu ya Afya kinga na Afya Tiba juu ya magonjwa yasiyoambukiza ili jamii ipate uelewa wa namna ya kuepukana na magonjwa hayo na kutoa matibabu bure kwa Wananchi ambao tayari wanasumbuliwa na magonjwa yasiyoambukiza, kwani jamii yenye Afya bora inaweza kufanya kazi kwa bidii na kuufukuza umaskini.

“Nitoe rai kwa Wananchi wa Bagamoyo kuzingatia kula lishe bora kwa wakati, kufanya mazoezi, kufanya vipimo kuangalia hali za Afya zetu mara kwa mara na kuepuka matumizi ya sigara na vilevi vingine kama Pombe kupitiliza kwani mtindo huu wa maisha unaweza kusaidia kuepuka kupata magonjwa yasiyoambukiza kama Kisukari, Siko seli, shinikizo la damu, uoni hafifu, udumavu, utapiamlo, magonjwa ya meno n.k” Amesema Bi. Kasilda

Nae Mkurugenzi Mtendaji wa Halmashauri ya Wilaya ya Bagamoyo Bi. Fatuma O. Latu akizungumza katika kumbukizi hiyo amewasisitiza Wananchi kuacha hofu ya kupima Afya zao kwa hiyari mara kwa mara bila kusubiri kufanya hivyo pale wanapokutwa na maradhi na kuwashauri pia kujenga utaratibu wa kujitolea damu kwa hiyari ili benki ya damu katika Vituo vya kutolea huduma za Afya isikaukiwe damu.

“Wengi wetu tumekuwa waoga sana wa kufanya vipimo kutazama hali zetu za Afya, jambo hili hupelekea wengi kufika Hospitali kupatiwa matibabu wakiwa katika hali mbaya za ugonjwa ambapo wangekuwa na utaratibu wa kujitazama Afya mara kwa mara wangeepuka kufikia hatua mbaya ya ugonjwa na kupunguza gharama kubwa za matibabu” Amesema Mkurugenzi Fatuma

Anaongeza Mkurugenzi Fatuma, “Niwaombe Wananchi wa Bagamoyo pia kujenga utaratibu wa kujitolea damu ili kuimarisha benki ya damu katika Hospitali ya Wilaya ya Bagamoyo na katika Vituo vingine vya kutolea huduma za Afya kwani benki ya damu inapokuwa ya uhakika Wananchi pia wanakuwa na uhakika wa huduma hiyo ambayo mara nyingi huwa ni ya dharura yasiyoweza kusubiri pale mgonjwa anapoihitaji”.

Bi. Rehema Kingu ni Muuguzi Mkuu wa Hospitali ya Wilaya ya Bagamoyo na mratibu wa maadhimisho hayo amesema tafiti zinaonesha kuwa mnamo Mwaka 2019 magonjwa yasiyoambukiza yanaongezeka kwa kasi, na inakadiriwa kuwa Asilimia 60 ya vifo vyote Duniani vilivyotokea, vilisababishwa na magonjwa yasiyoambukiza na Asilimia 43 ya watu Duniani wanaugua magonjwa yasiyoambukiza.

“Kama juhudi hazitachukuliwa ni Dhahiri kuwa idadi ya vifo vitokananvyo na magonjwa yasiyoambukiza Duniani itaongezeka hadi kufikia Asilimia 73 ya vifo vyote ifikapo Mwaka 2020, hata hivyo takwimu pia zinaonesha kuwa katika Nchi yetu ya Tanzania hadi kufikia Mwaka 2019 Asilimia 31 ya vifo vilitokana na magonjwa yasiyoambukiza” Amesema Bi. Rehema

Kwa Mwaka 2020 kauli mbiu ya magonjwa yasiyoambukiza inasema “Tutembee pamoja katika kuzuia na kudhibiti magonjwa yasiyoambukiza”