UANDIKISHAJI WAPIGA KURA KWENYE DAFTARI LA KUDUMU KUANZA TAREHE 14 FEBRUARI

Posted on: February 10th, 2020

Mafunzo maalum kwa maafisa waandikishaji wa wananchi katika uboreshaji wa daftari la kudumu la wapiga kura, yamefanyika kwa siku mbili Wilayani hapa, kuanzia leo tarehe 10 – 11 Februari, 2020, ambapo yamefunguliwa

Mafunzo haya yamehusisha jumla ya waandikishaji wasaidizi 137 na wasimamizi wa mashine za uandikishaji “BVR” yamelenga kutoa uzoefu juu ya ujazaji wa fomu zote zitakazohusika katika uandikishaji huo, pia mafunzo ya matumizi ya mashine za uandikishaji yaani “BVR”.

Akifungua mafunzo hayo Afisa mwandikishaji wa Halmashauri ya Wilaya ya Bagamoyo Bi. Fatuma O. Latu, amesema zoezi la uandikishaji Wananchi kwa Halmashauri ya Wilaya ya Bagamoyo litaanza Ijumaa ya tarehe 14 Februari 2020 na kukamilika Tarehe 20 Februari, 2020 katika vituo mbalimbali vilivyopo katika Kata na Vitongoji Wilayani hapa.

Akaongeza,”nina hakika baadhi yenu mlibahatika kushiriki katika zoezi la uboreshaji wa daftari la orodha ya wapiga kura lililofanyika mwishoni mwa mwaka jana kwa ajili ya maandalizi ya Uchaguzi wa Serikali za mitaa hivyo mna uzoefu katika uratibu na kusimamia utekelezaji wa uandikishaji wa wapiga kura katika daftari la kudumu la wapiga kura.  Ni Imani yangu kuwa kwa kutumia uzoefu mlio nao, mtafanya kazi yenu kwa ufanisi mkubwa, kwa bidii na moyo wa kujituma, ili kufanikisha zoezi hili, pia mtatumia uzoefu wenu mlionao kuwasaidia wenzenu ambao hawakuwahi kushiriki katika zoezi hili ili nao waweze kutekeleza majukumu yao kikamilifu kwa kipindi hiki”

 Aidha, amewanasihi washiriki hao wa mafunzo kuhakikisha wanatunza siri, pia kutunza vifaa vyote vitakavyotumika katika zoezi hilo kwani vimenunuliwa kwa gharama kubwa, na kuzingatia maelekezo yote yatakayotolewa na tume ili yawasaidie katika utekelezaji wa zoezi hilo la uboreshaji wa daftari la wapiga kura.

Akaongeza, napenda kuwahakikishia Wananchi wote wa Halmashauri ya Wilaya ya Bagamoyo kwamba, Serikali ya Wilaya ya Bagamoyo imedhamiria kuhakikisha kuwa zoezi hili linafanyika kwa ufanisi mkubwa na kuomba uwepo ushirikiano mkubwa kati ya watendaji wote katika zoezi hili, ambao ni Serikali, vyama vya siasa, na wadau wengine wote.

Nae Makamu Mwenyekiti wa Tume ya Taifa ya Uchaguzi (NEC), Jaji Mbarouk Salum Mbarouk akiwa katika usimamizi wa zoezi hilo, amefika katika mafunzo hayo ili kujionea namna yanavyoendeshwa.

Jaji Mbarouk amesema Zoezi hili la uboreshaji wa daftari la kudumu la wapiga kura ni zoezi la Kitaifa na lilizinduliwa rasmi na Mhe. Waziri Mkuu Kassim Majaliwa Majaliwa huko Mkoani Kilimanjaro mnamo Mwezi Julai, 2019.

Pia ametumia fursa hiyo kuwaasa washiriki wa mafunzo hayo kuhakikisha wanalipa zoezi hilo uzito unaostahili na kulifanya kwa umakini mkubwa ili liweze kufanikiwa kwa Asilimia 100.