UJENZI WA KITUO CHA AFYA MATIMBWA KUPUNGUZA MSONGAMANO HOSPITALI YA WILAYA YA BAGAMOYO

Posted on: August 24th, 2018

Utekelezaji wa mradi wa Ujenzi wa Kituo cha Afya Matimbwa unaoendelea kutekelezwa hivi sasa, unatarajiwa kupunguza kwa kiasi kikubwa msongamano wa Wagonjwa katika Hospitali ya Wilaya ya Bagamoyo na hivyo kuboresha utoaji huduma za Afya katika Halmashauri ya Wilaya ya Bagamoyo.

Ujenzi wa kituo cha Afya Matimbwa, kilichopo katika Kata ya Yombo, Wilayani Bagamoyo, ni mradi unaotekelezwa kwa fedha zilizotolewa na Serikali kuu chini ya Ofisi ya Rais TAMISEMI, kiasi cha Shilingi za Kitanzania Milioni 400.

Mradi wa ujenzi wa Kituo cha Afya Matimbwa ulianza rasmi utekelezaji wake mnamo tarehe 26 Julai, 2018 na unatekelezwa chini ya utaratibu wa ‘force account’ yaani kutumia mafundi wa kawaida wa ndani wakiwa chini ya usimamizi wa Muhandisi Mkuu wa Halmashauri.

Hadi sasa majengo matatu yanaendelea kujengwa katika mradi huu, ambayo ni jengo la Nyumba ya Mtumishi, Maabara na jengo la tatu ni jengo ambalo limeunganishwa majengo mawili ndani ya moja, na limeunganisha jengo la wodi ya wazazi na jengo la upasuaji.

Nyumba ya mtumishi hadi kufikia sasa ipo katika hatua ya gebo, pia jengo la maabara lipo katika hatua hiyo hiyo ya gebo huku jengo la Wodi ya wazazi ambalo limeunganishwa na jengo la upasuaji likiwa katika hatua ya kupandisha nguzo.

Mradi wa ujenzi wa kituo cha Afya Matimbwa utakapokamilika unatarajiwa kutoa huduma kwa wakazi wa Kata ya Matimbwa na Kata jirani za Fukayosi, Makurunge, na Kiromo.

Ujenzi wa Kituo cha Afya Matimbwa unatarajiwa kukamilika mwishoni mwa Mwezi wa tisa Mwaka 2018 na kuanza kutoa huduma kwa Wananchi wa Halmashauri ya Wilaya ya Bagamoyo wanaoishi jirani na Kituo hicho cha Afya.