WANAFUNZI 120 SEKONDARI KUSHIRIKI UMISSETA KIMKOA

Posted on: May 25th, 2018

Kambi rasmi ya UMISSETA iliyoketi kwa wiki moja katika Shule ya Sekondari Bagamoyo imefungwa rasmi tarehe 25.05.2018 na Kamanda wa TAKUKURU Wilaya ya Bagamoyo Ndg. Raymond Kitima aliyemwakilisha mgeni rasmi aliyetarajiwa kuwa Mkuu wa Wilaya ya Bagamoyo Mhe. Majid Mwanga.
Wanafunzi wapatao 120 wanaunda kikosi maalum kitakachoshiriki Mashindano ya Mkoa yatakayofanyikia Wilayani Kibaha kwa ajili ya kuandaa timu ya UMISSETA ya Mkoa wa Pwani itakayoshiriki mashindano ya UMISSETA Kitaifa Mkoani Mwanza yanayotarajiwa kuanza tarehe 06 June, 2018.
Akizungumza wakati wa kufunga kambi hiyo ya UMISSETA kwa Halmashauri ya Wilaya ya Bagamoyo, Kamanda wa TAKUKURU Wilaya ya Bagamoyo, Ndg. Raymond Kitima amewaasa vijana hao kudumisha nidhamu na kuepuka kabisa utovu wa nidhamu, ili waweze kufika mbali kimichezo.
Akaongeza, “Mtakapokuwa katika kambi Maandalizi ya UMISSETA Kimkoa hakikisheni mnacheza kwa kufuata sheria na taratibu zilizowekwa katika kila Mchezo, kwani kila mchezo una sheria na taratibu zake zinazopaswa kufuatwa, lakini pia kwa watakaopata bahati ya kuchaguliwa kwenda kuwakilisha Mkoa wa Pwani Kitaifa pia nawasihi mkatuwakilishe vyema, mcheze kwa juhudi na maarifa na kuuletea Mkoa wa Pwani heshima ya Kimichezo inayostahili”
Nae Mkurugenzi wa Halmashauri ya Wilaya ya Bagamoyo Bi. Fatuma Latu amewakumbusha vijana hao kuwa Michezo ni Afya, Ajira, burudani lakini pia hujenga ushirikiano, upendo udugu na uzalendo na kuwatia moyo Wanafunzi hao kwenda kwenye kambi ya Mkoa na kucheza kwa ari kwani Michezo pia itawasaidia kuwajenga kimwili kiakili na siku moja itawapatia ajira na hivyo kuwa chanzo cha mapato yao na kuwakomboa kiuchumi.
Afisa Michezo wa Halmashauri ya Wilaya ya Bagamoyo Ndg. Vedastus Mziba amesema Kambi ya UMISSETA ya Halmashauri ya Wilaya ya Bagamoyo iliingia kambini tarehe 22.05.2018 ikiwa na jumla ya Wanafunzi 129, Wavulana 69 na Wasichana 60 ambapo baada ya mchujo walibakiwa na Wanafunzi 120. Vijana hawa walijiandaa katika michezo ya mpira wa miguu, mpira wa mikono, mpira wa kikapu na mpira wa pete.
Michezo mingine ilikuwa ni riadha mita 100, 200,400, 800 na 1500, kwaya, ngoma, ngonjera na mashairi.