UTALII WA UTAMADUNI UBORESHWE: OLE GABRIEL

Posted on: August 23rd, 2017

Katibu Mkuu Wizara ya Habari, Utamaduni, Sanaa na Michezo, Prof. Elisante Ole Gabriel amehimiza jamii kwa ujumla kuthamini na kufanya utalii wa kiutamaduni ili kuulinda na kuuhifadhi utamaduni wa Mtanzania.

Akiwa katika ziara maalumu ya kutembelea maeneo ya uhifadhi wa mali kale mjini Bagamoyo jana, Prof. Gabriel amesema “Ili kuufikia uchumi wa viwanda ni vyema jamii na Halmashauri kwa ujumla wakatilia mkazo na kuongeza nguvu katika sekta ya utalii wa utamaduni, mali kale na filamu za kitanzania kwani hizi ni njia zinazoweza kuinua uchumi wetu na kutuongezea kipato”.

 Katika ziara hiyo Katibu Mkuu Ole Gabriel alitembelea eneo la uhifadhi la mambo ya kale la caravan serai na ngome kongwe yote yaliyopo mjini Bagamoyo na kujionea mali kale zilizohifadhiwa katika ameneo hayo, pia kupatiwa historia ya maeneo hayo yaliyotumiwa hasa wakati wa utawala wa Wajerumani.

Katika ziara hiyo Prof. Gabriel aliongozana na Katibu Mtendaji wa Bodi ya Filamu Nchini Bi. Joyce Fissoo ambaye nae alitoa wito kwa uongozi wa Wilaya na Mkurugenzi wa Halmashauri ya Wilaya ya Bagamoyo kuvifanyia tathmini vibanda vya kuoneshea filamu ili kuhakikisha filamu zinazooneshwa katika vibanda hivyo zinazingatia maadili ya Mtanzania na kuviwekea utaratibu wa uoneshwaji wa filamu hizo.

Nae Kaimu Mkurugenzi wa Halmashauri ya Wilaya ya Bagamoyo Bw. Peter Fussi amemshukuru Katibu Mkuu kwa kufanya ziara hiyo katika Halmashauri ya Bagamoyo ambayo imewaacha na hamasa ya kuboresha utalii wa kiutamaduni ambao pia ni chanzo cha mapato kwa Halmashauri.