VIFAA VYA UCHUGUZI WA DAMU VYAITAJIKA.

Posted on: April 10th, 2021

Hospitali ya Wilaya ya Bagamoyo iliopo Mkoa wa Pwani inauhitaji wa vifaa maalumu vinavyotumika kufanyia uchunguzi wa wingi wa damu (Cuveit Hb 201) kwajili ya vituo maalumu vya wagonjwa wa siko seli Wilayani hapo.

Hayo yamesemwa na Mganga Mkuu wa Hospitali ya Wilaya ya Bagamoyo Dk. Lunango Mwakipasile pamoja na Mratibu wa Magonjwa yasiyoambukizwa  wa Wilaya hiyo Bi. Rehema Kingu walipo zungumza kwenye jukwaa la Mashujaa wa siko seli.

Dk.Mwakipasile ameeleza kuwa Hospitali hiyo ina mashine kwajili ya uchunguzi huo, hata hivyo vifaa hivyo  (Cuveit Hb201) vinaitajika  kwakuwa hutumika sambamba na mashine zilizopo ili kufanikisha  uchunguzi huo.

“Mashine ipo ,lakini changamoto ni vifaa hivi ambavyo seti moja inauzwa 160,000 MSD (Bohari kuu ya dawa)

“Sasa ukiwa na wagonjwa 50 unaitaji Sh.4,000 kwa kifaa kimoja cha kila Mgonjwa mmoja, hapa kliniki wanahudhuria wagonjwa 145 ni idadi kubwa, ndio maana tunawaalika wadau waje tushirikiane nao ili tuzidi kutoa huduma bora kwa Wagonjwa hawa” amesema  Dk. Mwakipasile.

Aidha Dk. Mwakipasile amesema bado kuna wagonjwa wengi waliopo majumbani kwa maana hiyo Jamii inatakiwa ipewe Elimu,ili wagonjwa  waweze kutambulika na kupatiwa matibabu mara baada ya kutambulika.

Kadharika Bi. Rehema Kingu ambae ni mratibu wa magonjwa yasio ambukizwa wa Hospitali hiyo amesema Kliniki ya Siko Seli ndani ya Wilaya hiyo imeanzishwa August 2020  kwa kushirikiana na kitengo cha Siko Seli , Chuo kikuu cha Afya na Sayansi Shirikishi Muhimbili (MUHAS).

“Kabla ya kuanzisha kitengo iki tuliona kuna changamoto kubwa ya Elimu,uelewa ni mdogo kwenye jamii juu ya ugonjwa huu

”Bagamoyo ni miongoni mwa halmashauri iliopo za pwani, na sisi tumebahatika kuwa wa kwanza kufungua kliniki hii, tunatoa wito kwa wadau na jamii wazidi kushirikiana nasi

“Pia tunaitaji wafadhili ili tuweze kwenda  kwenye jamii kuelimisha ilikuondoa Imani potofu iliopo juu ya magajwa yasio ambukizwa ikiwemo Siko Seli”Amesema Bi.Rehema

Wagonjwa wa Siko Seli upungukiwa damu mara kwa mara hivyo uongozi wa Hospitali hiyo umeomba wadau mbalimbali kujitokeza kujitolea kuchangia damu pamoja na ujenzi wa jengo maalumu  kwajili ya kutolea huduma ya kliniki kwa wagonjwa hao.

Mwanzilishi wa Jumuiya ya Wagonjwa wanao ishi na Siko seli Tanzania Arafa Said amesema lengo la jukwaa hilo ni kufikisha elimu sahihi kwa jamii juu ya ugojwa huo.

Tamasha la vijana ni maalumu kwajili ya kukuza uelewa mpana juu ya ugonjwa wa siko seli pia ni muhimu kutoa elimu hiyo ili kuendelea kuwa mashujaa ambao wanaishi kwa matumain kama ilivyo kwa watu wengine” amesema Arafa

Ugonjwa wa siko seli ni ugojwa wa kurithi unaosababisha mabadiloko yasiyo ya kawaida katika chembechembe nyekundu za damu,pia mtu hawezi kupata ugojwa wa siko seli kwa kuambukizwa kwa njia yeyote isipokuwa kwa kurithi.