VITAMBULISHO VYA WAJASIRIAMALI AWAMU YA PILI VYAANZA KUTOLEWA BAGAMOYO

Posted on: May 26th, 2020

Vitambulisho maalum vya wajasiriamali tayari vinapatikana katika Ofisi za Biashara zilizopo Halmashauri ya Wilaya ya Bagamoyo baada ya Bagamoyo kupokea mgao wa Vitambulisho hivyo kutoka Ofisi za Mkuu wa Mkoa wa Pwani.

Mkuu wa Wilaya ya Bagamoyo, Mhe. Zainab Kawawa, ameyasema hayo wakati wa makabidhiano wa vitambulisho hivyo baina yake na Wakurugenzi wa Halmashauri ya Wilaya ya Bagamoyo na Chalinze amesisitiza uaminifu na ushirikiano baina ya watendaji wanaohusika na katika zoezi hilo ili kukamilisha zoezi hilo kwa ufanisi na kwa wakati.

Makabidhiano hayo yamefanyika kwa kusaini mkataba maalum baina ya Mkuu wa Wilaya ya Bagamoyo na Wakurugenzi wa Halmashauri za Wilaya ya Bagamoyo na Chalinze.

Naye Mkurugenzi wa Halmashauri ya Wilaya ya Bagamoyo Bi. Fatuma O. Latu akizungumza mara baada ya makabidhiano hayo ameahidi kusimamia na kutekeleza zoezi hilo maalum kwa kadiri ya maelekezo ya Mhe. Mkuu wa Wilaya ili kutekeleza zoezi hilo kwa wakati na kwa kuzingatia sifa za Wajasiriamali wadogo wanaostahili kupatiwa vitambulisho hivyo ambavyo vinamuhitaji mjasiriamlai mdogo kuwa na biashara isiyozidi mtaji wa Shilingi 4,000,000/- ili kupata sifa ya kupatiwa kitambulisho cha Mjasiriamali.

Serikali ya awamu ya tano chini ya uongozi wa Mhe. Rais John Joseph Pombe Magufuli, ilianzisha utaratibu wa kuwapatia wajasiariamali wadogo vitambulisho maalum vya wajasiriamali kwa bei ya Shilingi 20,000/-, ambapo katika awamu ya kwanza Mwezi Desemba, 2018 Serikali ilitoa jumla ya Vitambulisho 670,000 ambapo kila Mkuu wa Mkoa Nchini alipewa vitambulisho 25, 000 avigawe kwa wafanyabiashara wadogo katika Mikoa yao.