WAANDIKISHAJI WAPIGA KURA WAPIGWA MSASA BAGAMOYO

Posted on: October 7th, 2019

Mafunzo maalum kwa waandikishaji wapiga kura katika daftari la orodha ya wapiga kura katika Halmashauri ya wilaya ya Bagamoyo yamefunguliwa rasmi na Mkurugenzi Mtendaji wa Halmashauri ya Wilaya ya Bagamoyo, Bi. Fatuma O. Latu ambapo itafanyika kwa siku tatu, kuanzia tarehe 4 – 6 Oktoba, 2019.

Mafunzo hayo yenye lengo la kuwanoa waandikishaji imefanyika katika ukumbi wa Tasuba Wilayani hapa na yamehudhuriwa na waandikishaji wapatao 396 watakaoandikisha wapiga kura katika Vitongoji 167 vya Halmashauri ya Wilaya ya Bagamoyo.

Msimamizi Mkuu wa uchaguzi katika halmashauri ya wilaya ya Bagamoyo, Bw. Malboard Kapinga ametumia mafunzo hayo kuwaeleza waandikishaji juu ya taratibu za uandikishaji, huku akiwaasa kuzizingatia na kuzifuata ili kuepusha migongano isiyo ya lazima wakati wa zoezi la uandikishaji.

Mafunzo hayo pia yamewapa fursa waandikishaji kujua namna ya kukabiliana na vitendo vya rushwa katika zoezi la uandikishaji wapiga kura, ambapo Afisa TAKUKURU Wilayani hapa Bi. Neema Runana amewataka wandikishaji kutoa taarifa kwa mamlaka husika pindi watakapokutana na Mazingira ya utoaji au upokeaji rushwa katika zoezi la uandikishaji wapiga kura katika daftari la orodha ya wapiga kura.

Nae Afisa uchaguzi wa Halmashauri ya Wilaya ya Bagamoyo, Bi. Teesya Urasa ameeleza kuwa zoezi hilo litafanyika kwa muda wa siku 7 kuanzia tarehe 8 - 14 oktoba 2019 kuanzia saa 2 Asubuhi hadi 12 Jioni.

Akaongeza, “wandikishaji mnatakiwa mfuate sheria na maadili yanayo waongoza kama vile kutopiga kampeni, kuvaa mavazi yenye kuashiria chama chochote cha siasa na kutotoa orodha ya waliojiandikisha kabla ya siku iliyopangwa”

Mafunzo hayo yametolewa kwa waandikishaji wapiga kura katika daftari la orodha ya wapiga kura, na yalijikita katika kuwajengea uwezo Waandikishaji juu ya Malengo ya Uandikishaji ,aina ya Madaftari ya orodha ya wapiga kura, sifa za anayejiandikisha, muda wa kujiandikisha,  vifaa vitakavyotumika,  wahusika katika chumba cha kujiandikisha, muda wa kujiandikisha na kazi za waandikishaji.