WADHIBITI UBORA ELIMU ACHENI LUGHA ZA VITISHO KWA WATEJA: DKT AKWILAPO

Posted on: October 5th, 2020

Katibu Mkuu Wizara ya elimu, sayansi na teknolojia dkt. Leonard Akwilapo amewataka wadhibiti ubora wa shule nchini kutekeleza majukumu yao kwa weledi na kuacha lugha za vitisho kwa wateja

Dkt. akwilapo ameyasema hayo katika ufunguzi wa mafunzo maalum kwa wathibiti wakuu ubora wa Shule kanda na Wilaya zote Tanzania bara, wapatao 217, yanayofanyika wilayani bagamoyo kwa muda wa siku tatu kuanzia tarehe 05 – 09 Oktoba, 2020 yakiwa na lengo la kuwaongezea ujuzi wa masuala mbalimbali ya utendaji katika utumishi wa umma na kuwasaidia wathibiti wakuu ubora wa shule kuondoa ama kurekebisha changamoto za kiutendaji ambazo zimekuwa zikiripotiwa kwa uongozi wa wizara mara kwa mara katika maeneo wanayosimamia.

“Wizara imekuwa ikipokea malalamiko kutoka kwa wadau na watoaji wa elimu kuhusu mwenendo usiofaa wa baadhi ya Wathibiti Ubora wa Shule kutoa lugha za vitisho kwa wateja na wakati mwingine kuwaomba Rushwa ili kufanikisha usajili wa Shule au Vyuo vyao na hii ni kukiuka maadili ya utendaji katika utumishi wa umma kwa kutozingatia sheria, kanuni na maadili ya utendaji katika utumishi wa Umma na wadhibiti ubora wa elimu wanaofanya vitendo hivi waache mara moja kwani taarifa zako zitakapotufikia hatutasita kukuchukulia hatua za kinidhamu” Amesema Dkt. Akwilapo.

Nae Mshiriki wa Mafunzo hayo Bi.  Tatu Tamizi Kutoka Wilaya ya Gairo akizungumza kwa niaba ya Washiriki wenzake wa mafunzo hayo amesema, wanashukuru sana Wizara ya elimu, Sayansi na Teknolojia kwa kuwaandalia mafunzo hayo ambayo wanaamini yatawaongezea weledi na ufanisi katika utendaji kazi wao na hivyo kuboresha utoaji huduma za elimu Nchini.