WAHUDUMIENI WANANCHI KWA MOYO MWEUPE

Posted on: March 25th, 2020

Hayo yamesemwa leo na Katibu Tawala wa Wilaya ya Bagamoyo, Bi. Kasilda Mgeni, mara baada ya kufanya ziara katika Hospitali ya Wilaya ya Bagamoyo, ili kujionea namna huduma zinavyotolewa na wagonjwa wanavyohudumiwa hospitalini hapo.

Bi. Kasilda, ameyasema hayo alipofanya ziara hiyo maalum iliyokuwa na lengo la kuhamasisha utoaji huduma bora kwa wananchi ili kupunguza malalamiko ya wananchi juu ya huduma zinazotolewa hospitalini hapo, pia kusikiliza kero na changamoto zinazowakabili watumishi na watoa huduma.

“Niwapongeze watoa huduma wetu, madaktari na wauguzi kwa huduma nzuri mnazowapatia wananchi wanapofika hapa Hospitali wakihitaji huduma za Kiafya, hakika mnajitahidi, lakini niwakumbushe kuhakikisha mnatoa huduma hizi kwa moyo mweupe, kwa kujitoa na kwa kuzingatia maadili ya Utumishi wa umma, kila mtu awajibike kwenye eneo lake kwa weledi mkubwa hii itasaidia sana kupunguza malalamiko kwa wananchi tunaowahudumia” Amesema Bi. Kasilda

Nae Mganga Mfawidhi wa Hospitali ya Wilaya ya Bagamoyo Dkt. Aliko Mbughi amesema, kama Watumishi, wanajitahidi kwa kadiri ya uwezo wao kuhakikisha wanatoa huduma bora kwa Wananchi na kwa wakati licha ya changamoto mbalimbali walizonazo kama uhaba wa vifaa tiba na uchakavu wa majengo ambazo wamekuwa wakizitatua kwa kadiri fedha zinavyopatikana na kuendelea kutenga kwenye bajeti yao ya Idara ya Afya kila Mwaka.

Katika Ziara hiyo pia Katibu tawala, Bi. Kasilda mgeni pia alipata fursa ya kuona baadhi ya wagonjwa waliolazwa katika wodi za wanawake, wanaume na watoto, kuwapa pole na kuwatia moyo huku wagonjwa hao wakionesha kufurahia jinsi huduma za Afya zilivyoboreshwa hospitalini hapo.

Wakati huo huo, Bi. Kasilda ametumia fursa hiyo kusikiliza baadhi ya kero za Watumishi wa Hospitali hiyo ambapo wengi wamelalamikia upandishwaji wa madaraja kusua sua hivyo akaahidi kulichukua suala hilo na kwenda kulifanyia kazi, ili watumishi hao nao wafurahie kutumika kama Watumishi wa umma na kuimarisha utoaji huduma bora kwa jamii wanayoihudumia.

Katika ziara hiyo Bi. Kasilda ametembelea eneo la mapokezi (OPD), Jengo la kupokelea wagonjwa wa dharura, duka la dawa la jamii, dirisha la bima, kitengo cha X-ray, Jengo la upasuaji, Wodi za wanawake, wanaume na watoto, Jengo la methadone, jengo la kuhifadhia maiti, maabara, kitengo cha macho na kitengo cha utoaji nasaha na kupima (CTC) ambako kote ameongea na Watumishi wa vitengo hivyo akiwasisitiza juu ya utoaji huduma bora kwa wananchi kwa kuzingatia sharia, taratibu na kanuni za Utumishi wa umma.

maendeleo, kuzungumza na wananchi na kusikiliza changamoto na kero zao ili kuyapatia majawabu.