WAJIBIKENI KWA KUFUATA SHERIA, TARATIBU, KANUNI NA MONGOZO YA UTUMISHI WA UMMA: DAS BAGAMOYO

Posted on: March 13th, 2020

Katibu Tawala wa Wilaya ya Bagamoyo, Bi. Kasilda Mgeni, amewaasa Maafisa Tarafa na Maafisa Watendaji wa Kata Wilayani humo kuhakikisha wanawatumikia wananchi kwa kuzingatia Sheria, kanuni, miongozo na taratibu za Serikali ili kupunguza kama si kumaliza kabisa kero na malalamiko ya Wananchi katika Tarafa na Kata za Wilaya hiyo.

Bi. Kasilda ameyasema hayo kwenye kikao kazi maalum kati yake na Maafisa hao ambacho hufanyika mara moja katika kila robo mwaka, ikiwa ni utaratibu aliojiwekea ili kukutana na Maafisa Tarafa na maafisa watendaji kata wa Wilaya ya Bagamoyo ili kuwakumbusha wajibu wao kwa Serikali na kwa Wananchi lakini pia kusikiliza changamoto wanazokutana nazo na kuzitafutia ufumbuzi ili kuboresha utendaji kazi wa Serikali katika Wilaya ya Bagamoyo, ikizingatiwa kwamba Maafisa hao ndio wanaohusika na kuwahudumia Wananchi moja kwa moja.

“Mara zote hakikisheni kuwa mnawajibika kwa umma kwa kutoa huduma bora kwa Wananchi, zingatieni utii kwa Serikali, bidii ya kazi, Udilifu na kufuata Sheria,toeni huduma kwa Wananchi bila upendeleo, pia msisahau kuzingatia matumizi sahihi ya taarifa za Serikali” Amesema Bi. Kasilda

Vile vile, ametumia fursa hiyo kusisitiza usimamizi sahihi wa fedha za Serikali zinazopelekwa katika Kata wanazosimamia, pia kusimamia kwa umakini utekelezaji wa miradi ya maendeleo inayotekelezwa na Serikali katika Kata zao na kuisaidia Serikali kukusanya mapato katika vyanzo vilivyopo katika Kata zao na kuwa wazalendo kwa kuhakikisha wanaziba mianya ya uvujaji wa mapato ya Halmashauri yanayokusanywa katika Kata wanazosimamia.

Akizungumza baada ya mafunzo hayo, Mtendaji wa Kata ya Nia Njema Bw. Cezary Madasha amesema, kikao kazi hicho kitaleta tija kubwa kwa kuonesha matokeo chanya katika yote waliyofundishwa na kukumbushwa na kwamba watashirikiana kuhakikisha wanaisaidia Ofisi ya Mkuu wa Wilaya na Mkurugenzi katika kuiletea Bagamoyo maendeleo Kwa kuhakikisha utoaji wa huduma bora kwa Wananchi wa Bagamoyo.