WALIMU NA WANAFUNZI WALIONG'ARA MATOKEO YA KIDATO CHA NNE NA CHA PILI WAZAWADIWA

Posted on: May 2nd, 2018

Halmashauri ya Wilaya ya Bagamoyo imefanya kikao cha tathmini ya kiwango cha ufaulu wa mitihani ya kidato cha nne na mtihani wa kujipima wa kidato cha pili iliyofanyika mwishoni mwa mwaka 2017, na kuwazawadia walimu, shule na wanafunzi waliofanya vizuri zaidi katika mitihani hiyo.
Kikao hicho kilichofanyika Aprili 30, 2018 katika Shule ya Sekondari Bagamoyo, kilihudhuriwa na Walimu, Wakurugenzi wa Shule za Sekondari, Wawakilishi wa taasisi za kifedha na wadau mbalimbali wa elimu ndani ya Halmashauri, huku mgeni rasmi akiwa ni Katibu tawala wa Wilaya ya Bagamoyo Bi. Erica Yegela.
Halmashauri ya Wilaya ya Bagamoyo ina jumla ya Shule 21 za Sekondari, kati ya hizo 12 ni binafsi na 9 za Serikali, na kwa mwaka 2017, Shule 18 zilishiriki kufanya mtihani wa kumaliza elimu ya Sekondari (kidato cha nne), ambapo jumla ya Wanafunzi 1,667 walifanya mtihani huo, kati ya Wanafunzi 1,680 walioandikishwa, kati yao Wasichana ni 949 na Wavulana 718 sawa na asilimia 99.23% ya Wanafunzi walioandikishwa.
Akizungumza katika kikao hicho, Mkuu wa Idara ya elimu msingi katika Halmashauri ya Wilaya ya Bagamoyo, Bi. Violeth Mlowosa amesema, Halmashauri ya Wilaya ya Bagamoyo imefanikiwa kushika nafasi ya kwanza kitaifa kati ya Halmashauri 195 nchini, katika mitihani ya Taifa ya kidato cha nne mwaka 2017, baada ya kupata GPA ya 3.29 ambapo kwa mwaka 2016 ilishika nafasi ya 17.
Anaongeza, Wanafunzi waliofaulu walikuwa 1,250 (Wavulana 525 na Wasichana 727) sawa na 74.49%, lakini Wanafunzi 291 (Wavulana 114 na Wasichana 177) sawa na 17.46% walishindwa mtihani huo na Wanafunzi 126 (Wavulana 81 na Wasichana 45) sawa na 7.55% matokeo yao yalizuiliwa.
Anasema, kwa upande wa mtihani wa upimaji wa kidato cha pili (FTNA) jumla ya wanafunzi 2022 walifanya mtihani kati yao Wavulana 826 na Wasichana 1162. Jumla ya Wanafunzi 214 (Wavulana 98 na Wasichana 116) walishindwa na hivyo kutakiwa kurudia kidato cha pili Mwaka 2018.
Mgeni rasmi katika kikao hicho Bi. Erica Yegela ambae pia ni Katibu Tawala wa Wilaya ya Bagamoyo, akizungumza na washiriki wa kikao hicho amesema, ni vyema kuweka mkakati maalum wa kuboresha ufaulu kwa kuongeza mbinu bora za ufundishaji, pia kuanzishwa kwa mikutano ya walimu, wazazi na wanafunzi watakaokaa na kujadili kwa pamoja changamoto anazokumbana nazo Mwanafunzi zinazopelekea kudunisha ufaulu wa mwanafunzi, kisha kumsaidia kutatua changamoto hizo ili aweze kufanya vizuri shuleni.
Akawataka pia walimu kuzingatia ufundishaji kwa vitendo (practical) zaidi na kuacha kutegemea kufundisha nadharia peke yake hasa kwa masomo ya Sayansi.
Vilevile akawaasa walimu juu ya kuzingatia nidhamu na weledi na akaishauri Ofisi ya Mkurugenzi kuwapa nafasi walimu wanaotaka kujiendeleza kimasomo kwa kuwaweka katika mpango wa bajeti bila kuwa na urasimu wowote.
Wakati huo huo, Bi. Yegela akawapongeza pia sekta binafsi na mashirika ya dini yaliyowekeza katika sekta ya elimu ndani ya Halmashauri ya Wilaya ya Bagamoyo huku akiwanzadi kuwa Shule zao ndizo zinazofanya vizuri zaidi na kupelekea Halmashauri yetu kupata nafasi ya kuongoza Kitaifa kwa kushika nafasi ya kwanza katika matokeo ya kidato cha nne kwa mwaka 2017.
Akaongeza, nidhamu na maadili mema ni chachu ya mafanikio na ufaulu wa wanafunzi, hivyo vijana wanaojiunga na chama cha skauti mashuleni wasipuuzwe,m watiwe moyo, waelekezwe na kuongozwa vyema kwani mafunzo wanayaoyapata kupitia chama hiko cha skauti yanawasaidia pia kujenga nidhamu na afya.
Akatumia fursa hiyo pia kutoa pongezi kwa Mkurugenzi wa Halmashuri, Mkuu wa idara ya Elimu sekondari, Wanafunzi, Walimu, Wazazi, Walezi na wadau mbalimbali wa elimu katika halmashauri
Zawadi za vyeti na fedha taslimu zilitolewa kwa Walimu, Wanafunzi na Shule zilizofanya vizuri zaidi katika masomo ya Sayansi na Sanaa kwenye mitihani ya Taifa ya kidato cha nne iliyofanyika novemba 2017, na mitihani ya kujipima ya kidato cha pili ambayo pia ilifanyika mwishoni mwa Mwaka jana katika Halmashauri ya Wilaya ya Bagamoyo.