WALIMU WANAODANGANYA UMRI WA KUSTAAFU KUKIONA

Posted on: May 30th, 2018

Na Adili Mhina,

Katibu wa Ofisi ya Rais, Tume ya Utumishi wa Walimu (TSC), Bibi Winifrida Rutahindurwa amewaonya waalimu wanaofanya udanganyifu kwa lengo la kujiongezea muda wa kuwepo katika utumishi wa Umma licha ya muda wao wa kustaafu kuwa umefika.

Bibi Rutahindurwa alitoa kauli hiyo leo Mei 30 , 2018 mjini Bagamoyo alipokutana na waalimu wakuu na wakuu wa shule wa wilaya za Bagamoyo na Chalinze kwa lengo la kutoa elimu juu ya wajibu wa walimu wakuu na  wakuu wa shule kwa mujibu wa sheria ya Tume ya Utumishi wa Walimu na. 25 ya mwaka 2015.

Alieleza kuwa wapo baadhi ya walimu waliobadilisha taarifa zao na zikaingizwa kwenye stakabadhi za mishahara kwa lengo la kujipunguzia umri ili kuendelea kuwepo kazini kinyume na taratibu za utumishi wa umma.

“Kuna baadhi ya waalimu wanajifanya hawakumbuki walizaliwa mwaka gani wakati walijaza mikataba wakati wanaaza ajira na wengi wao wamebadilisha taarifa zao na kujipunguzia umri jambo ambalo ni kinyume na taratibu na sheria”.

 “Nimegundua kuwa wapo baadhi ya waalimu ambao pindi walipoagizwa na waajiri wao kupeleka taarifa zao binafsi walijifanya hawakumbuki mwaka waliozaliwa, wakaamua  wakajipunguzia umri ili wendelee kuwepo kazini kwa muda mrefu zaidi”, alisema Bi. Rutahindurwa.

Alitoa ufafanuzi kuwa mwalimu atakapoandikiwa kibali cha kustaafu, pamoja na kuangalia stakabadhi ya mishahara kigezo kikubwa kitakachotumika kuangalia umri halisi wa mwalimu kustaafu ni taarifa alizojaza awali wakati anaanza ajira yake.

Bi. Rutahindurwa aliweka bayana kuwa yapo madhara kwa mwalimu ambaye muda wake wa kustaafu utafika lakini akaendelea kuwepo kazini kwa kuwa watakapodai mafao yaake atakatwa mishahara yote aliyolipwa kwa kipindi chote alichofanya kazi baada ya muda wake wa halali kupita.

Alisisitiza,“ naomba muwaeleze walimu wote katika shule zenu kuwa utakapoandikiwa kibali cha kustaafu sisi tunaangalia zaidi taarifa zako ulizojaza wakati unaajiriwa. Ikibainika umedanganya utachukuliwa hatua kwa kuwa umemwibia mwajiri”.

Alieleza kuwa kwa walimu wote ambao hawakumbuki taarifa walizojaza kwenye mikataba yao wakati wa kuanza kazi wawasiliane na ofisi za tume ya utumishi wa walimu katika Wilaya zao ili kupata uhakika wa tarehe zao za kustaafu.

Akaongeza, kwa mujibu wa sheria ya utumishi wa walimu namba 25 ya mwaka 2015, wao ndio mamlaka ya kwanza ya nidhamu kwa walimu. Hivyo, wanapaswa kuwashauri na kuwaelimisha walimu badala ya kukaa na kusubiri wafanye makosa ili wawachukulie hatua.

Kwa upande wao walimu walionesha kupokea maelekezo hayo na kuahidi kuyafanyia kazi ili kuondoa usumbufu kwa mwalimu pale anafuatilia masuala yake ya mafao mara baada ya kustaafu.

Walimu hao wametoa pongezi kwa katibu wa TSC kwa jitihada kubwa anazofanya katika kuhakikisha mashauri ya waalimu yanafanyiwa kazi kwa wakati na maamuzi yanatolewa kwa muda muafaka.