WANAFUNZI 148 WA SHULE YA SEKONDARI KINGANI WAADHIMISHA MIAKA 54 YA MUUNGANO KWA KUFANYA USAFI SOKO LA SAMAKI

Posted on: April 26th, 2018

Wanafunzi wapatao 148 toka Shule ya Sekondari Kingani iliyopo katika Halmashauri ya Wilaya ya Bagamoyo, wameshiriki kuadhimisha sherehe za miaka 54 ya Muungano wa Tanganyika na Zanzibar kwa kuendesha zoezi la Usafi katika Soko la Samaki lililopo Pwani ya Bagamoyo mjini.

Wanafunzi hao wa Kidato cha kwanza hadi cha nne ni wanachama ya Klabu ya wapinga Rushwa Shuleni hapo ambayo mbali na kufanya uhamasishaji na uelimishaji kwa Wanafunzi wenzao juu ya madhara ya Rushwa pia hujihusisha na masuala ya utunzaji wa mazingira.

Caroline Kabile Mwanafunzi wa kidato cha nne Shule ya Sekondari Kingani ni Mwenyekiti wa Klabu hii na hapa anabainisha “Leo tumeadhisha miaka 54 ya Muungano wa Tanganyika na Zanzibar, lakini Klabu yetu kwa kuona umuhimu wa tukio hili, tumeamua kuja kufanya usafi katika soko hili la Samaki, lakini pia tumetumia fursa hii kuwaelimisha wavuvi na wafanya biashara wa eneo hili kuzingatia Usafi wanapokua katika shughuli zao za kila siku katika maeneo haya ili kuepuka madhara tanayoweza kutokea kwa wao kufanya shughuli zao katika eneo chafu, hasa magonjwa ya mlipuko kama kipindu pindu na mengineyo yanayosababishwa na uchafu”.

Nae Afisa usafi na Mazingira wa Halmashauri ya Wilaya ya Bagamoyo, Ndg. Cleophace Murugwa akizungumza na wanafunzi hao kwa niaba ya Mkurugenzi wa Halmashauri ya Wilaya ya Bagamoyo, amewashukuru Wanafunzi hao kwa moyo wao wa kujitolea lakini pia kutambua umuhimu wa kutunza mazingira na uelimishaji umma kwa njia ya vitendo namna ya kutunza mazingira yao na kuzingatia usafi na kuwaasa kutoishia hapo bali kuendeleza hulka hiyo hata wanapokuwa Shuleni na majumbani mwao.

Wakati huo huo Taasisi ya Elimu ya ADEM iliyopo Bagamoyo nao wameadhimisha  miaka 54 ya Muungano kwa kufanya zoezi la upandaji miti 200 katika eneo la Taasisi yao.

Mtendaji Mkuu wa Taasisi hiyo Dr. Siston Mgula akizungumza wakati wa zoezi hilo chuoni hapo amesema “Nichukue nafasi hii kumpongeza Rais wa Jamuhuri ya Muungano wa Tanzania Dr. John Joseph Pombe Magufuli na Rais wa Zanzibar na Mwenyekiti wa Baraza la Mapinduzi Mheshimiwa Dkt. Ali Mohamed Shein na watanzania wote kwa kuadhimisha miaka 54 ya muungano wa Tanganyika na Zanzibar lakini pia akatumia fursa hiyo kuwaasa Walimu wanaosoma katika Taasisi hiyo kuwa mabalozi wazuri wa utunzaji mazingira pindi watakapomaliza masomo yao chuoni hapo na kurudi katika vituo vyao ya kazi.

Mkataba wa Muungano wa Tanganyika na Zanzibar ulitiwa saini rasmi na Mwalimu Julius Nyerere na Abeid Amani Karume, Aprili 22, 1964, Zanzibar na Maadhimisho ya Muungano kitaifa yamefanyika Mkoani Dodoma katika Uwanja wa Jamuhuri mapema leo Asubuhi na kuhudhuriwa na Viongozi mbali mbali wa ndani na nje ya Tanzania.