WANANCHI TUJITOKEZE KUSAIDIA KUPATIKANA KAYA MASIKINI..

Posted on: April 19th, 2021

Mwenyekiti wa Halmashauri ya Wilaya ya Bagamoyo  Mhe. Mohamedi Usinga ametoa wito kwa wananchi kujitokeza kwa wingi ili kuweza kusaidia zoezi la kuzipata kaya masikini kuweza kuingia kwenye mpango wa kunusuru kaya masskini (Tasaf).

Hayo ameyasema wakati wa kikao kazi  cha kujenga uelewa kuhusu mpango wa kunusuru kaya maskini kipindi cha pili kwa viongozi,watendaji na wawezeshaji tarehe 19 Aprili 2021kilichofanyika katika ukumbi wa Halmashuri ya Wilaya ya Bagamoyo.

Mhe Usinga amewataka wananchi kujitokeza kwenye mikutano yote ili walengwa waweze kupatikana kwa haki bila kuwepo upendeleo na uonevu wakati wa utafutaji wa kaya maskini katika sehemu zote ambazo zitapitiwa na mpango huu.  ‘’Natoa wito kwa wananchi wote kujitokeza kwa wingi katika mikutano yote ambayo itaitishwa na viongozi kwa ajili ya kufanya zoezi la upatikanaji wa kaya maskini wajitokeze kwa wingi ili kusaidia zoezi hili liende kama lilivyo pangwa’’alisema  Mwenyekiti wa Halmashauri.

Aidha Mwenyekiti huyo wa Halmashauri ametoa wito kwa Tasaf kusimamia na kufanya ufuatiliaji ili kuweza kuona namna ambavyo wananchi wanapata stahiki ambazo wamepanga kuzipata na kuboresha maisha yao ili yaweze kubadirika kupitia mfuko huo wa Tasaf.

Nae mratibu wa kunusuru kaya masikini Tasaf katika Halmashauri ya Bagamoyo Bw. Deionises Gozbert Mahilane amesema kuwa, mafunzo yanakwenda vizuri  ambapo nia na lengo la mafunzo hayo ni kujenga uwezo ili kuweza kujua ni taratibu gani zitatumika kuwapata walengwa wa kaya maskini  katika vijiji  na vitongoji vyote.

Mratibu huyo wa Tasaf Wilaya amesema, mpango uliopita uliwapata walengwa kwa asilimia 70 katika vijiji vyote  na kwa sasa  watachukuliwa wale  asilimia 30 waliobaki awamu ya kwanza kwa vijiji saba vya  Halmashauri  Wilayanya Bagamoyo vilibaki  ili kukamilisha asilimia 30 zilizobaki.  ‘’Katika Halmashauri ya Bagamoyo kuna vijiji saba vilivyobaki ambavyo ni kata ya Fukoyosi kijiji cha kidomole,kata ya yombo kijiji cha yombo kata ya Kiromo kijiji cha Kiromo, na Kitopeni,kata ya Zinga kijiji cha Mlingotini, kwa Mazinga na Pande’’alisema Mratibu wa Tasaf.

Tasaf imeandaa utaratibu wa kufikia Vijiji/Mitaa/Shehia ambazo hazikufikiwa kwenye sehemu ya kwanza ya mpango utambuzi wa kaya masikini utafanywa na wanajamii kupitia mikutano  ya vijiji/mitaa/shehia kwa usimamizi wa wawezeshaji kutoka mamlaka za maeneo ya utekelezaji kwa kuzingatia vigezo vilivyowekwa.