WASICHANA WA MIAKA 14 KUKINGWA NA SARATANI YA SHINGO YA KIZAZI

Posted on: April 27th, 2018

Halmashauri ya Wilaya ya Bagamoyo imeendesha mafunzo maalum ya kuwaelimisha Walimu wa Shule za Msingi na Sekondari juu ya Uanzishwaji wa chanjo mpya ya Saratani ya mlango wa kizazi (HPV)
Mafunzo hayo yametolewa leo Ijumaa Aprili 27, 2018 katika ukumbi wa Mwambao uliopo katika Shule ya Msingi Mwambao Wilayani Bagamoyo na kuhudhuriwa na walimu takribani 50 toka Shule za Msingi na Sekondari zilizopo ndani ya Halmashauri ya Wilaya ya Bagamoyo.
Mwezeshaji wa mafunzo hayo Dr. Mohamed Farah akizungumza wakati wa mafunzo hayo amesema Lengo la kuendesha mafunzo hayo ni kuwajengea uwezo na kuwapatia uelewa mkubwa zaidi walimu hao juu ya chanzo cha Saratani ya mlango wa kizazi, namna ya kujikinga na matibabu yake, lakini hasa ni uanzishwaji wa chanjo hiyo nchini ambapo watoto wa kike wenye umri wa miaka 14 watapatiwa chanjo hiyo.
Nae Ndg. Gerald Manasseh Afisa mratibu wa Uanzishwaji wa chanjo mpya ya saratani ya mlango wa kizazi kutoka Ofisi ya Rais – TAMISEMI anaeratibu mafunzo hayo kwa Mkoa wa Pwani, akizungumza wakati wa mafunzo hayo amesema, “Serikali imedhamiria kuutokomeza kabisa ugonjwa huu wa saratani ya mlango wa kizazi kwani umekua ukisababisha vifo vingi kwa wanawake nchini hivyo uanzishaji wa chanjo hii utasaidia sana kuondokana na janga hili.