WATAALAM WAASWA KUFANYA KAZI KWA WELEDI ILI KUONDOA HOJA ZA UKAGUZI

Posted on: July 26th, 2018

Katibu Tawala Mkoa wa Pwani Ndg. Zuberi Samataba amewaasa wataalam wa Halmashauri kufanya kazi kwa kushirikiana na Mkurugenzi na Waheshimiwa Madiwani ili kuhakikisha wanapunguza kama si kuziondoa kabisa hoja za ukaguzi katika Halmashauri hiyo.
Bw. Samataba ameyasema hayo mapema jana alipokuwa akizungumza katika kikao cha baraza la waheshimiwa madiwani wa Halmashauri ya Wilaya ya Bagamoyo kilichoketi kujadili taarifa ya Mkaguzi Mkuu wa Serikali kwa Mwaka wa fedha 2016/2017.
“Nawapongeza sana Halmashauri ya Wilaya ya Bagamoyo kwa kupata hati safi yaani (unqualified audit Opinion) lakini niwashauri Wataalam wa Halmashauri hususani Mweka hazina na Afisa manunuzi, kufanya kazi zenu vizuri na kuhakikisha mnashauri vizuri Mkurugenzi, katika masuala ya fedha ili kuepuka hoja za ukaguzi zisizo za lazima” Amesema Bw. Samataba.
Akaongeza, ni vyema wataalam mkaweka utaratibu wa kuandaa taarifa zenu vizuri, kwa usahihi, kwa umakini mkubwa na zinapohitajika basi ziwasilishwe kwa wakati zikiwa na vielelezo vyake, na kutofanya hivyo ni kushindwa kuwajibika katika nafasi zenu mlizoaminiwa na Serikali, na kama kuna mtaalam anayeona hawezi kufanya kazi zake vizuri basi awapishe wengine wenye uwezo wa kufanya kazi hizo bila kuiletea Halmashauri hoja za ukaguzi zisizo za lazima.
Nae Mkaguzi Mkuu wa Hesabu za Serikali Mkoa wa Pwani,  Bw. Eliuther Masombola akizungumza katika kikao hicho amesema, ukaguzi wa mwaka 2016/2017 ulifanyika kwa mujibu wa viwango vya kimataifa ambapo walitumia sampuli na matokeo ya ukaguzi yalitokana na vielelezo na takwimu zilizowasilishwa kwa Mkaguzi Mkuu wa Serikali.
Pia  Bw. Masombola ameipongeza Halmashauri ya Wilaya ya Bagamoyo kwa hesabu safi za Mwaka 2016/2017, lakini pia akawaasa Wataalam wa Halmashauri, kujitahidi kuzingatia maoni yaliyotolewa na kamati ya Ukaguzi ili kuziondoa hoja hizo.
Wakati  huo huo, Mwenyekiti wa Halmashauri ya Wilaya ya Bagamoyo, Mhe. Alli Alli Issa kupitia kikao hicho cha baraza la madiwani amempongeza Mkurugenzi wa Halmashauri ya Wilaya ya Bagamoyo, pamoja na timu yake ya wataalam kwa hesabu safi za Mwaka 2016/2017 na kuwaasa kuendelea kufanya kazi vizuri na kwa umakini mkubwa ili Mwaka ujao pia wabaki na hati safi ya ukaguzi.