WATOTO CHINI YA MIAKA MITANO WAANZA KUPATIWA VYETI VYA KUZALIWA BURE BAGAMOYO

Posted on: December 6th, 2019

WATOTO WENYE UMRI CHINI YA MIAKA MITANO KUPATIWA VYETI VYA KUZALIWA BURE BAGAMOYO

Halmashauri ya Wilaya ya Bagamoyo, imeanza utekelezaji wa zoezi la usajili na utoaji vyeti vya kuzaliwa kwa watoto wenye umri chini ya miaka mitano kuanzia leo tarehe 06 – 19/12/2019.

Zoezi hili limezinduliwa rasmi na Mkuu wa Wilaya ya Bagamoyo, Mhe. Zainab Kawawa katika kliniki ya Mama na mtoto ya Hospitali ya Wilaya ya Bagamoyo (RCH) mapema leo asubuhi.

Akizungumza katika uzinduzi huo Mhe. Zainab amesema ni haki ya kila mtoto kupata cheti cha kuzaliwa, hivyo ni wajibu wa kila mzazi kuhakikisha mtoto wake anapata cheti cha kuzaliwa na katika kufanikisha hilo, ni vema wazazi kutumia fursa hii kuwasajili watoto wao walio chini ya umri wa miaka mitano ili wapatiwe vyeti vya kuzaliwa.

“Ni matumaini yangu kuwa kampeni hii itakuwa shirikishi, Mzazi ukipata cheti cha mwanao cha kuzaliwa, ukienda nyumbani usikifiche, nendeni mkawe mabalozi wazuri kwa wazazi wengine, kawaambieni kuwa vyeti vimeanza kutolewa bure kwa watoto walio chini ya umri wa miaka mitano ili wengine pia wafike kusajili watoto wao na kupatiwa vyeti hivi vya kuzaliwa na hatimaye, kila mtoto anayelengwa katika mpango huu apate cheti cha kuzaliwa” Amesema Mhe. Zainab.

Nae Bi. Zuwena Selemani mmoja wa wazazi aliyefanikiwa kufanya usajili wa mtoto wake leo katika kituo cha usajili cha Hospitali ya Wilaya ya Bagamoyo, na binti yake Prisca Denis kupatiwa cheti cha kuzaliwa, ameishukuru Serikali kwa kuleta mpango huu karibu na wananchi kwani ni msaada mkubwa kwa wananchi wa Bagamoyo na kuongeza kwamba, ni hakika sasa kuwa kila mtoto aliye chini ya miaka mitano atapata cheti cha kuzaliwa kwa urahisi tena katika eneo analoishi.

Mpango wa usajili na utoaji vyeti vya kuzaliwa kwa watoto wenye umri chini ya miaka mitano, utatekelezwa katika Halmashauri ya Wilaya ya Bagamoyo kwa muda wa wiki mbili kuanzia leo tarehe 06/12/2019 na utakamilika tarehe 19/12/2019, na baada ya hapo huduma hii itaendelea kutolewa katika vituo vyote vya kutolea huduma za Afya vya Serikali kwa kila mtoto atakayezaliwa katika vituo hivyo.

Halmashauri ya Wilaya ya Bagamoyo imejiwekea lengo la kusajili na kutoa vyeti vya kuzaliwa kwa jumla ya watoto 14,565 kupitia mpango huu unaotekelezwa na Serikali ya Tanzania ikishirikiana na Serikali ya watu wa Canada, Shirika la Umoja wa Mataifa linaloshughulikia watoto (UNICEF), Kampuni ya mawasiliano ya Tigo na Wakala wa Usajili, ufilisi na udhamini (RITA)