WATUMISHI NA WANANCHI WAJITOKEZA KUFANYA USAFI WA JUMAMOSI YA MWISHO WA MWEZI

Posted on: September 29th, 2018

Zoezi la usafi wa mazingira linalofanyika kila kila jumamosi ya mwisho wa Mwezi limefanyika kwa Ufanisi katika Halmashauri ya Wilaya ya Bagamoyo ambapo Wananchi na Watuishi wamejitokeza kushiriki zoezi hilo katika maeneo mbalimbali ndani ya Halmashauri.

Jumamosi ya Mwisho wa Mwezi ni siku iliyotengwa kwa ajili ya zoezi la kufanya usafi wa mazingira kitaifa, na Kwa Halmashauri ya Wilaya ya Bagamoyo, zoezi hilo limefanyika kuanzia saa 12:00 Asubuhi hadi saa 04:00 Asubuhi ya leo Tarehe 29 Septemba, 2018.

Akizungumza kwa niaba ya Afisa Afya wa Halmashauri ya Wilaya ya Bagamoyo, Bw. Mohamed Fara anasema chagamoto kubwa katika Siku hii ya Jumamosi ya usafi wa mazingira ni gari la kuzolea taka.

“Tuna changamoto kubwa ya gari la kuzolea taka, kwani mji mzima huu wa Bagamoyo unategemea trekta moja tu kwa ajili ya kusomba taka na kuzipeleka dampo, na kwa siku hii ambayo taka zinakusanywa kwa wingi baada ya Wananchi kutoka na kufanya usafi katika maeneo yao, hususani kwenye mitaro na pembezoni mwa barabara, taka ngumu nyingi zinakusanywa na trekta letu moja tunalotegemea kwa ajili ya kuzoa taka hizo linazidiwa na wingi wa taka zinazotolewa mitaani” Anasema Mohamed

Nae, Afisa Usafi na Mazingira Bw. Moses Mgalla amewashukuru watumishi na Wananchi wote wa Halmashauri ya Wilaya aya Bagamoyo kwa ujumla kwa kutoka mapema na kushiriki kufanya usafi wa mazingira yanayowazunguka, pia ametoa rai kwa Wananchi wa Halmashauri ya Wilaya ya Bagamoyo kufanya usafi kuwa sehemu ya maisha yao ya kila siku kwani kwa kufanya hivyo wataepuka magonjwa yatokanayo na kuishi katika mazingira machafu kama malaria, kuharisha na magonjwa ya mlipuko kama kipindu pindu.

Halmashauri ya Wilaya ya Bagamoyo ina jumla ya Kata 11, na siku ya jumamosi ya mwisho wa mwezi zoezi la usafi  wa mazingira husimamiwa na Watendaji wa Kata, vitongoji na Maafisa Afya katika Kata zote 11 za Halmashauri kuhakikisha zoezi hilo linafanyika kwa ufanisi.