WAZEE NI TUNU, TUWALINDE

Posted on: October 1st, 2020

Kila ifikapo Tarehe 01, Oktoba, Dunia huazimisha siku ya Wazee Duniani, na kwa Mwaka huu kauli mbiu inayobeba maadhimisho hayo inasema “Familia na jamii tuwajibike kuwatunza wazee”

Mratibu wa tathmini na ufuatiliaji wa taasisi isiyo ya Kiserikali ya ‘Help Age Tanzania’ Bi. Martha Kihampa ambaye alikuwa Mgeni mwalikwa akizungumza katika hafla hiyo amesema Wazee ni Tunu hivyo jamii ina wajibu wa kuwalinda na kuwatunza kama kauli mbiu ya Mwaka huu inavyoelekeza ili waishi kwa Amani na wafurahie uzee wao kwa kuamini kuwa jamii inayowazunguka ni msaada kwao na ipo tayari kuwalinda, kuwasaidia na kuwatetea wakati wote ili waishi maisha salama.

“Wazee wetu ni tunu yetu, ni kisima cha busara na viongozi wetu wanaoweza kutuelekeza namna bora ya kuishi na kufanya maamuzi sahihi yatakayoleta matokeo chanya katika jamii yetu, hivyo tuna wajibu wa kuwalinda na kuwatunza” Amesema Bi. Martha

Anaongeza, Idara ya Afya tunawaomba sana mtusaidie, anzisheni dirisha la kuhudumia wazee na wazee wawekewe bajeti inayojitegemea ya ununuzi wa dawa zao za matibabu ya wazee, hakikisheni mnawapatia huduma rafiki za Kiafya wakati wote wanapofika katika Vituo vya kutolea huduma za Afya kupata huduma, Viongozi wa Hospitali ya Wilaya na vituo vingine vya kutolea huduma ya Afya, sisitizeni lugha nzuri kwa wazee na ni vyema kitengo cha ustawi wa jamii kuanza taratibu za kuunda mabaraza ya wazee katika kila Kata kwani huko ndiko wazee wanaweza kukaa na kupaza sauti kusema mahitaji yao na kupata ufumbuzi wa matatizo yao, pia kubadilishana mawazo na kufanya mazoezi na kushiriki michezo mbalimbali itakayowaburudisha pia.

Nae Afisa Ustawi wa Jamii Wilaya ya Bagamoyo, Bw. Rajab Mturuya akizungumza katika hafla hiyo ameelezea mafanikio ya kitengo cha Ustawi wa jamii Wilaya ya Bagamoyo katika kuhudumia Wazee amesema katika kipindi cha Mwaka 2018/2019 wamefanikiwa kutambua jumla ya Wazee 6113 katika Kata zote 11 za Halmashauri na hadi sasa jumla ya wazee 3416 wameshapatiwa vitambulisho vinavyowawezesha kupata huduma za Afya bure Hospitali ya Wilaya ya Bagamoyo na katika Vituo vingine vyote vya kutolea huduma za Afya vya Serikali katika Halmashauri ya Wilaya ya Bagamoyo na kuanzisha mabaraza ya wazee katika Kata 07 kati ya 11ambazo ni Kata ya Mapinga, Kerege, Zinga, Kiromo, Makurunge, Nia njema na Yombo.

Halmashauri ya Wilaya ya Bagamoyo imeadhimisha siku hii kwa Wataalam wa Afya kutoa huduma kwa Wazee katika Hospitali ya Wilaya ya Bagamoyo ambapo Wazee kwanza walipewa elimu na wataalam hao juu ya magonjwa yasiyoambukiza ambayo huwashambulia wazee kama vile, shinikizo la damu na utapiamlo unaosababishwa na lishe duni, mbali na magonjwa hayo Wazee hao walipewa elimu juu ya ugonjwa wa kifua kikuu, namna ya kujikinga na kuwahi matibabu wapatapo dalili za ugonjwa huo, umuhimu wa lishe bora na kupata mlo kamili wa kutosha kwa wakati na kwa usahihi, elimu juu ya Afya ya macho na umuhimu wa kufanya mazoezi ili kuboresha Afya zao.

Muuguzi Mkuu wa Hospitali ya Wilaya ya Bagamoyo Rehema Kingu ambaye alimuwakilisha Mganga Mkuu Wilaya, akizungumza na Wazee, wataalam wa Afya na Wananchi waliojitokeza katika hafla hiyo amesema Idara ya Afya imefanikiwa kuanziasha madirisha maalum ya kuhudumia wazee kuanzia katika Hospitali ya Wilaya ya Bagamoyo na katika Vituo vyote vya kutolea huduma za Afya vya Serikali na madirisha hayo yanatoa huduma bure kwa wazee licha ya changamoto za upungufu wa dawa wanazopata lakini pia wanajitahidi kukabiliana nazo ili Wazee wapate huduma bora za Afya wakati wanapozihitaji.

Akifunga hafla hiyo, Bi. Rehema pia ametoa shukrani za dhati kwa wadau walioshirikiana nao katika kufanikisha hafla hiyo ambao ni taasisi ya Help Age na good Samaritan kwa kujitoa kwao hata kufanikisha hafla hiyo ambayo mbali ya kupatiwa huduma za Afya bure Wazee pia wamepewa huduma ya staftahi ya Asubuhi.