WELEDI, KUJITUMA, UAMINIFU NA KUJITOA NI NGUZO KATIKA UTUMISHI WA UMMA

Posted on: February 26th, 2019

Hayo yamesemwa na Naibu Waziri ofisi ya Rais Menejimenti ya Utumishi wa Umma na Utawala Bora Dkt Mary Mwanjelwa katika mkutano maalum na watumishi wa Umma wa halmashauri ya Wilaya ya Bagamoyo uliofanyika siku ya jumamosi tarehe 23 Februari, 2019.

Katika hotuba yake iliyokuwa imesheheni maadili kwa watumishi umma wa Mhe. Mwanjelwa amewataka watumishi wa Umma Nchini kuzingatia sheria, taratibu na kanuni katika utekelezaji wa majukumu yao.

Mhe. Naibu Waziri akatumia fursa hiyo pia kuwaasa watumishi kuacha kufanya kazi kwa mazoea na kuwatahadharisha Wakuu wa Idara na Vitengo kuwa endapo watashindwa kuwasimamia watumishi waliochini yao watawajibika kwa mujibu wa sheria maana wamepewa dhamana ya kuwaongoza.

Akizungumza na watumishi ambao ni wasaidizi katika kada mbalimbali,Naibu waziri amewataka kuheshimu na kutekeleza maelekezo ya viongozi wao pasipo kusukumwa kwa mujibu wa sheria za Utumishi wa Umma.

Aidha Naibu Waziri Mhe. Mwanjelwa amewaasa Madiwani kama wasimamizi Wa halmashauri kuhakikisha wanazingatia sheria taratibu na kanuni katika maamuzi mbalimbali wanayoyafanya kwa upande wa watumishi na kutenda haki pasipo uonevu.

Wakati huo huo, Naibu waziri amezungumzia stahiki mbalimbali za watumishi wa Umma na kuwataka waajiri kushughulikia maslahi ya watumishi kwa umakini kwa kuziandaa nyaraka za watumishi kwa usahihi pasipo kukosea kabla ya kuzituma menejimenti ya Utumishi wa Umma.

"Nyaraka zikiandaliwa kwa usahihi menejimenti ya Utumishi wa Umma haichelewi kutekeleza, hivyo waajiri andaeni taratibu za watumishi kwa usahihi ili stahiki zao zisipotee” Amesema Mhe. Mwanjelwa

Mwisho naibu Waziri amewataka watumishi wa halmashauri ya Wilaya ya Bagamoyo kuwa wazalendo na waadilifu kwani serikali ya awamu ya tano chini Rais wa Jamhuri ya muungano wa Tanzania, Dkt John Pombe Magufuli ni ya uadilifu na si vinginevyo.

Naibu Waziri Mhe. Mary Mwanjelwa pia ametumia ziara yake katika Halmashauri ya Wilaya ya Bagamoyo kutembelea shughuli za wanufaika wa TASAF katika Kijiji cha Kongo, amabo wana mradi wa kulima shamba la mihogo lenye ukubwa wa ekari 17.