MEFADA MKOMBOZI WA WARAIBU WA DAWA ZA KULEVYA BAGAMOYO

Posted on: May 22nd, 2020

Asasi isiyo ya Kiserikali ya MEFADA (Methadone Family Against Drugs Abuse), imefanya utambulisho rasmi wa asasi hiyo pamoja na uzinduzi wa shughuli zake Wilayani Bagamoyo leo, ili jamii ya Bagamoyo ianze kufaidika na huduma zitolewazo na Asasi hiyo.

Akizungumza katika uzinduzi huo, Mkurugenzi wa Asasi hiyo Ndg. Alex Chitawale amesema Asasi hiyo inajishughulisha na utoaji elimu juu ya madhara yatokanayo na dawa za kulevya, UKIMWI, homa ya ini n.k

“Tuna lengo la kuona jamii yetu hasa vijana wakiishi bila kutumia dawa za kulevya na wale ambao wameshaingia katika tatizo hili wakipata usaidizi wa kitaaluma kama vile, tiba, ushauri nasihi na huduma zingine” Amesema Ndg. Chitawale

Anaongeza “Tangu kuanza kwa shughuli za Asasi yetu hapo Mwaka 2015 mpaka sasa tumeshatoa elimu katika Mikoa ya Dar Es Salaam, Dodoma na Pwani, ambapo kwa Dar Es Salaam walengwa 2100 wamefikiwa, Dodoma walengwa 157 na sasa Bagamoyo tuna walengwa 51 ambao wananufaika na huduma zetu, aidha tumejikita pia kutoa elimu ya madhara yatokanayo na dawa za kulevya katika Shule za Sekondari, kuwatafuta na kuwafikia waraibu wa dawa za kulevya na kuwaunganisha na matibabu ya methadone, tumefanya vikao na waathirika wa dawa za kulevya vyenye ushawishi wa waraibu kufikiria kubadilika na kuachana na matumizi ya dawa za kulevya, pia tumefanya vikao vya ngazi za familia (Family Therapy) hususani kwa familia ambazo zina watu waliojiingiza katika matumizi ya dawa za kulevya ili kuwajengea uwezo wa namna ya kuwahudumia waraibu wanaoishi nao katika familia zao”

Wakati huo huo, Mtaalam toka tume ya uratibu na udhibiti wa dawa za kulevya Nchini   Bi. Salome Mbonile akizungumza katika uzinduzi huo amesema Asasi ya MEFADA ni moja kati ya Asasi ya kiraia wanayofanya kazi nayo na imeonesha matokeo Chanya katika kuisaidia jamii kuondokaa na matumizi ya dawa za kulevya kwa kuwahamasisha waraibu kujiunga na matibabu ya methadone hivyo kuomba Wananchi wa Bagamoyo kushirikiana nayo kwa karibu ili kuunga mkono mapambano dhidi ya matumizi ya dawa za kulevya Wilayani hapa.

Nae Afisa Tawala (W) Bi. Zubeda Omari ambaye alikuwa mgeni rasmi katika uzinduzi huo akimwakilisha Mkuu wa Wilaya ya Bagamoyo, Mhe. Zainab Kawawa amewakaribisha wataalam wa Asasi hiyo kufanya kazi Wilayani Bagamoyo huku akipongeza shughuli za Asasi hiyo na kuahidi ushirikiano mkubwa toka Ofisi ya Mkuu wa Wilaya ya Bagamoyo katika mapambano dhidi ya matumizi ya dawa za kulevya ili kuikomboa jamii ya Bagamoyo toka katika matumizi ya dawa hizo ambazo ni tishio kwa jamii hususani vijana ambao  ndio nguvu kazi ya Taifa.

Asasi ya MEFADA inafanya kazi Wilayani Bagamoyo katika Kata ya Magomeni, Kitongoji cha Maji Coast Mtaa wa Majengo na Wananchi wanaweza kufika katika Ofisi zao ili kupata huduma zitolewazo na Asasi hiyo.