WANAFUNZI BAOBAB WAFADHILI MAGODORO 30 KITUO CHA AFYA KEREGE

Posted on: November 7th, 2018

Wanafunzi wa kidato cha kwanza hadi cha sita, toka shule ya Sekondari Baobab iliyopo Mapinga Wilayani Bagamoyo, wametoa msaada wa magodoro 30 kwa ajili ya wodi ya wzazi katika kituo kipya cha Afya Kerege.

Vijana hao takribani 50 ni Wanafunzi wanaounda klabu ya UN-CLUB, (Klabu ya Vijana ya Umoja wa Mataifa) iliyoundwa shuleni hapo ikiwa na lengo la kuwafundisha Wanafunzi kujitoa na kusaidia jamii katika nyanja mbali mbali lakini pia huwasaidia wanafunzi wenzao wenye mahitaji maalum Shuleni hapo.

Akizungumza katika risala maalum ya Wanafunzi hao, Debora ambaye ni mwanafunzi wa kidato cha Sita katika Shule hiyo ya Baobab amesema, wamekuwa na utaratibu maalum wa kuhamasishana kupitia klabu yao na kutoa misaada ya kijamii kwa jamii ya Kitanzania yenye mahitaji kama vile vituo vya kulelea watoto yatima, n.k

“Tumekuwa tukitoa misaada ya kijamii katika vituo vya kulelea watoto yatima na wale waishio katika mazingira magumu. Hadi sasa tumefanikiwa kuifikia mikoa ya Morogoro, Pwani na Dar es Salaam. Baadhi ya vituo tulivyovipatia msaada ni kituo cha Mother Theresa na kituo cha CHAKUWAMA vyote vya Jijini Dar Es Salaam, Kituo cha Green pastures kilichopo Bagamoyo, Pwani na Kituo cha Mihayo kilichopo Morogoro kinachotoa huduma na kulea watoto wenye ulemavu wa ngozi. Tumekuwa tukitoa misaada ya vyakula kama vile mahindi, sukari, mafuta ya kupikia, mchele, unga na sabuni. Na mara hii tumeguswa kuja kukisaidia kituo hiki cha Afya Kerege, ikiwa ni katika kusaidia jamii yetu inayotuzunguka kwa kidogo tunavyojaliwa na Mwenyezi Mungu”, Anasema Debora.

Mwalimu Mkuu wa Shule hiyo ya Sekondari Baobab Mwl. Venance Hongoa amesema Wanafunzi hao wa Klabu ya UN- CLUB wameamua kutoa msaada huo wa magodoro 30 katika kituo hiko cha Afya Kerege ili kuunga mkono juhudi za Serikali ya Awamu ya tano inayoongozwa Mhe. Rais Dkt. John Joseph Pombe Magufuli za kuboresha na kuimarisha miundombinu ya kutolea huduma za Afya nchini na kuhakikisha inapunguza vifo vya mama na mtoto wakati wa kujifungua kwa kujenga vituo vipya vya Afya katika kila Halmashauri Nchini.

Akipokea msaada huo Mkurugenzi wa Halmashauri ya Wilaya ya Bagamoyo, Bi. Fatuma Latu amewashukuru sana Wanafunzi hao wa Shule ya Sekondari Baobab kwa kuwa na moyo huo wa kujitolea kwa jamii, lakini pia akaupongeza uongozi wa Shule hiyo kwa kuwafundisha vijana hao kuwa wazalendo na kuisaidia jamii yao inayowazunguka.

“Kituo hiki cha Afya Kerege ni moja ya kati ya Vituo vipya 44 vya Afya Nchini, vilivyojengwa katika awamu ya kwanza ya uimarishaji na uboreshaji wa miundombinu ya kutolea huduma za Afya unaofanywa na Serikali ya Awamu ya tano, ambapo kilishika namba 1 kwa ubora kati ya Vituo vyote 44 vilivyojengwa katika awamu hiyo ya kwanza. Kituo cha Afya Kerege kimeshaanza kutoa huduma kwa Wananchi kwa kutumia rasilimali zilizopo japo hazitoshi lakini kwa msaada huu mliotupatia leo mmetusaidia kupiga hatua kubwa sana ya utoaji huduma katika Kituo hiki cha Afya Kerege” Amesema Bi. Fatuma Latu.

Ujenzi wa Kituo cha Afya Kerege ulianza mnamo Mwezi Oktoba 2017 na kukamilika Mwezi Machi 2018 kwa ufadhili toka Serikali Kuu na umegharimu jumla ya Shilingi Mil. 500.