BAGAMOYO YANG’ARA TENA MATOKEO YA KIDATO CHA NNE 2018

Posted on: January 28th, 2019

Halmashauri ya Wilaya ya Bagamoyo imeongoza kwa ufaulu wa mitihani ya kidato cha nne Mwaka 2018 kwa kushika nafasi ya kwanza kati ya Halmashauri 194 za Tanzania Bara na Visiwani katika matokeo ya mtihani huo.

Matokeo hayo yaliyotangazwa na baraza la mitihani la Taifa NECTA mwishoni mwa wiki iliyopita yanaonesha Shule za Sekondari tatu zilizopo ndani ya Halmashauri ya Wilaya ya Bagamoyo zimeingia katika Shule 10 bora zilizofanya vizuri zaidi Nchini katika mitihani ya kidato cha nne iliyofanyika Mwezi Novemba 2018.

Shule za Bagamoyo zilizoingia katika 10 bora ni pamoja na Marian Boys iliyoshika nafasi ya 3 Kitaifa, Ahmes Sekondari ambayo imeshika nafasi ya 4 na Marian Girls Sekondari iliyoshika nafasi ya 8.

Wanafunzi waliongia katika 10 Bora ya Kitaifa toka Shule zilizopo katika Halmashauri ya Wilaya ya Bagamoyo ni pamoja na Avith Kibani aliyeshika nafasi ya pili kwa ufaulu Kitaifa, Gibson Katuma aliyeshika nafasi ya 7, Bryson Jandwa nafasi ya 8 na Isack Julius nafasi ya 9 wote wakitoka Sekondari ya Marian Boys Wilayani hapa.

Halmashauri ya Wilaya ya Bagamoyo imeongoza kwa mara ya pili mfululizo katika matokeo hayo ya kidato cha nne ambapo kwa Mwaka juzi 2017 iliongoza kwa kushika nafasi ya kwanza kwa ufaulu wa asilimia 81.12 na kwa Mwaka 2018 ufaulu huo umepanda hadi Asilimia 85.48.

KUONA MPANGILIO WA HALMASHAURI BOFYA HAPA