SUALA LA USAFI NA MAZINGIRA ISIACHIWE SERIKALI -DED BAGAMOYO...

Posted on: September 3rd, 2025

Mkurugenzi Mtendaji wa Halmashauri ya mji wa  Bagamoyo Bw. Shauri Selenda amesema kuwa suala la Usafi na Mazingira ni suala la wana Bagamoyo wote na siyo jukumu la kuiachia Serikali la kuhakikisha kuwa Mji unakuwa safi.

Hayo ameyasema leo Septemba 03, 2025 wakati akifungua warsha ya siku moja ya wadau wa Mazingira na Usafi uliyoandaliwa na Shirika la Umoja wa Maendeleo ya Kimataifa (UNDP) kwa kushirikiana na Shirika lisilo la Kiserikali la Taka Ajira Foundation kwa lengo la kujadili jinsi ya kuendeleza uwekezaji katika uwekaji ufumbuzi wa uchumi Duara Miji ya Pwani.

Amesema kuwa wananchi wa Bagamoyo wamejijengea dhana kuwa suala la usafi wao haliwahusu na suala hilo ni la Serikali pekee kitu ambacho si kweli huku akiwa na   imani kwa warsha hiyo inaweza kusaidia kuondoa dhana hiyo kwa  wakazi wa Bagamoyo.

“Usafi ni suala la watu wote na si la viongozi pekee, ambapo Mji wa Bagamoyo ukiwa safi ni sifa kwa wana Bagamoyo wote na siyo sifa inakwenda kwa viongozi wa Serikali” amesema Mkurugenzi Selenda.

Aidha ameongeza  kuwa mambo makubwa ya kuzingatia yanayoweza kufanya Mji  kuwa safi na kuwa na usimamizi bila taka, ni utoaji wa elimu ya usafi na mazingira, Pamoja na uwezeshaji wa wananchi kutambua kuwa suala la taka ni ajira na taka si uchafu na mtu anaweza kupata pesa na kujikwamua katika maisha yake kupitia taka. Lakini pia swala la usimamizi bora wa taka hususani kuipa thamani taka ziwe ajenda za kudumu katika vikao vyetu.

Mkurugenzi huyo ameongeza pia suala la usimamizi wa Sheria za Mazingira na Usafi zitakaposimamiwa vizuri Mji utakuwa safi na tutaongeza wingi wa watalii kutembela Mji wa Bagamoyo.