BAGAMOYO YATEKELEZA MAFUNZO YA UANDAAJI WA MIPANGO NA BAJETI ZA AFUA ZA LISHE KWA HALMASHAURI

Posted on: December 12th, 2019

Katika kuhakikisha kwamba hali ya lishe katika Halmashauri ya Wilaya ya Bagamoyo inaboreka hasa lishe ya mama na mtoto, Halmashauri imeendesha mafunzo maalum kwa wataalam wa kisekta wa Halmashauri yaliyohusu uandaaji wa mipango na bajeti za afua za lishe kwa Halmashauri kwa Mwaka wa fedha 2020/2021.

Mafunzo hayo yaliyohusu namna bora za uwekaji vipaumbele za masuala ya lishe katika mpango na bajeti ya Halmashauri yamefunguliwa rasmi na Mkuu wa Wilaya ya Bagamoyo, Mhe. Zainab Kawawa mapema tarehe 12/12/2019, katika Ukumbi wa Halmashauri ya Wilaya ya Bagamoyo.

Akizungumza katika ufunguzi wa mafunzo hayo Mhe. Zainab Kawawa amesema ni muhimu kwa jamii kutambua umuhimu wa kuzingatia lishe bora kwa mama na mtoto pia lishe ya watu wazima ili kuondokana na tatizo la utapimlo mkubwa uliokithiri katika jamii zetu kwa watu kutozingatia lishe bora.

“Tukiweza kudhibiti lishe duni katika jamii yetu, itasaidia kuleta maendeleo katika jamii yetu, kwani jamii yenye lishe duni haiwezi kushiriki katika shughuli za maendeleo kutokana na mwili kukosa afya na nguvu ya kufanya kazi na wakati mwingine kushambuliwa na magonjwa” Amesema Mhe. Zainab Kawawa

Ameongeza, Azma ya Serikali ni kuhakikisha jamii inafahamu juu ya umuhimu wa lishe bora na uzingatiaji wa lishe bora katika kukabiliana na tatizo la utapiamlo Nchini, hivyo amewaasa wataalam washiriki wa mafunzo hayo kuzingatia vipaumbele vya Serikali katika masuala ya lishe ya jamii wakati wa maandalizi ya mpango na bajeti wa Halmashauri kwa mwaka wa fedha 2020/2021 huku akisisitiza utoaji wa elimu kwa wananchi juu ya masuala ya lishe.

Tafiti mbalimbali zilizofanywa na taasisi ya chakula na lishe Nchini, (TFNC) ambao pia wamewezesha mafunzo hayo, zinaonesha kumekuwa na tatizo kubwa la utapiamlo uliokithiri si kwa watoto tu bali hata kwa watu wazima kwani wengi wao hawazingatii lishe bora.

Ili kukabiliana na tatizo hili kubwa la utapiamlo kwa watoto na watu wazima, Serikali kupitia Wizara ya Nchi Ofisi ya Rais TAMISEMI, inayosimamia Halmashauri zote Nchini imeandaa mafunzo haya maalum yanayofanyika katika Halmashauri zote ili wakati Halmashauri zinaandaa mpango na bajeti wa Halmashauri husika ihakikishe inazingatia vipaumbele vya masuala ya lishe ili kuboresha hali ya lishe katika Halmashauri husika.

Mafunzo haya ya uandaaji wa mipango na bajeti za afua za lishe kwa Halmashauri yamefanyika kwa siku moja na yamehudhuriwa na wataalam wa kisekta toka Idara ya Afya, Mifugo na Uvuvi, Kilimo, Elimu Sekondari na Msingi, Maendeleo ya Jamii, Mipango na Takwimu, wawakilishi toka asasi za kiraia na wawezeshaji toka OR – TAMISEMI, Taasisi ya chakula na lishe (TFNC) na Mratibu wa lishe Mkoa wa Pwani.