BANDARINI KUCHELE, WAFANYABIASHARA WAANZA KUSHUSHA KWA KASI MIZIGO BANDARI YA BAGAMOYO

Posted on: June 5th, 2020

Ikiwa ni siku moja tu tangu Mkuu wa Wilaya ya Bagamoyo afanye Mkutano maalum na wafanyabiashara wanaotumia bandari ya Bagamoyo, waliokuwa wameikacha bandari hiyo, na kuwasihi wafanya biashara hao kuanza kutumia bandari hiyo kama ilivyo kuwa awali, jana jioni majahazi mawili yenye shehena ya mafuta yaliingia katika bandari hiyo, ikiwa ni ishara ya kuisha kwa mgomo wa kutoitumia bandari hiyo uliowekwa na wafanya biashara hao kwa takribani kipindi cha miezi mitatu iliyopita.

Mkuu wa Wilaya ya Bagamoyo Mhe. Zainab Kawawa alishirikiana na wafanyabiashara hao kuyapokea majahazi hayo yaliyotokea Zanzibar yakiwa na shehena ya mafuta ya kula aina ya OKI yakitokea Unguja, huku wafanyabiashara hao wakionesha kufurahishwa sana na kitendo cha Mkuu wa Wilaya kufika bandarini hapo na kushirikiana nao kupokea majahazi hayo.

“Niliahidi kufika hapa leo kushirikiana nanyi kupokea bidhaa ikiwa mngekubali kuanza tena kutumia bandari yenu ya Bagamoyo, na nimetimiza ahadi yangu hiyo, na nimefurahishwa sana kwa ninyi kuitikia kwa vitendo wito wangu wa kurejea katika bandari yenu ya Bagamoyo na kuanza kuitumia tena, bandari  hii ipo kwa ajili yenu, nawasihi endeleeni kuitumia bandari yenu ya Bagamoyo, kero na malalamiko yenu tayari nimeyashughulikia, hakuna atakayewabughudhi tena na atakayejaribu kufanya hivyo Ofisi yangu iko wazi njooni tuzungumze, na nichukue fursa hii kusisitiza suala la wafanya biashara wadogo wanaoutumia bandari hii maarufu kama “shuba shuba” ni marufuku kwa watendaji kuwabughudhi shubashuba tangu leo, waacheni wafanye shughuli zao kwa uhuru wapeni huduma wanazostahili na tendeni haki kwa wafanya biashara wote” Amesisitiza Mhe. Zainab

Baada ya mapokezi hayo bandarini hapo, Mwenyekiti wa Chama cha Wachukuzi katika Bandari ya Bagamoyo Bw. Andrew Nyoni amezungumza na kusema Tumefarijika sana na kufurahishwa sana na kitendo hiki cha Mkuu wetu wa Wilaya ya Bagamoyo kufika hapa leo na kushirikiana nasi kupokea majahazi haya yenye bidhaa za mafuta tuliyoagiza kutoka Unguja, aliahidi kama tukikubali kuagiza mzigo kupitia bandari yetu ya Bagamoyo, basi shehena ya kwanza itakayofika atahakikisha anakuja kushirikiana nasi kupokea mzigo, na kweli leo ametimiza ahadi yake kwa kufika hapa, ni jambo la kufurahisha sana, hii haijawahi kutokea, tumefarijika sana na tunamwahidi Mhe. Mkuu wa Wilaya yetu kuwa kazi ndio imeanza, tupo tayari na tumamua sasa tutaendelea kutumia bandari yetu hii maana ametutia moyo sana kwa kushughulikia kwa haraka mno kero zetu tulizomfikishia hapo juzi, tunamshukuru sana.

Bandari ya Bagamoyo ni moja ya vyanzo vikuu vya Mapato katika Wilaya ya Bagamoyo na kusimama kwa biashara katika bandari hiyo kulipelekea mapato kushuka kwa kiasi kikubwa hali iliyopelekea Mhe. Mkuu wa Wilaya kufanya Mkutano maalum na wafanya biashara wanaotumia bandari hiyo, kusikiliza malalamiko na kero zao kisha kuzitaftia ufumbuzi wa haraka, na kuwasihi wafanya biashara hao kuanza tena kutumia bandari hiyo, jambo lililoitikiwa kwa mlengo chanya na wafanyabiashara hao.