BARAZA LA WAHE. MADIWANI WARIDHIA BAJETI YA HALMASHAURI YA WILAYA YA BAGAMOYO KWA MWAKA 2019/2020

Posted on: January 30th, 2019

Baraza la Madiwani la Halmashauri ya Wilaya ya Bagamoyo jana tarehe 29/01/2019 limepitisha makisio ya mpango na bajeti ya Halmashauri ya Wilaya ya Bagamoyo kwa Mwaka wa fedha 2019/2020 kiasi cha Tsh. 31,744,995,832.00. Kati ya fedha hizo Tshs. 2,750,562,366.00 ni ruzuku ya miradi ya maendeleo, Tshs 1,374,830,000.00 ni ruzuku ya matumizi ya kawaida, Tshs. 24,672,905,808 mishahara, na Tshs 2,946,697,658.00 ni mapato ya ndani.

Aidha Halmashauri imejiwekea mikakati mbalimbali ili kuhakikisha ukusanyaji wa mapato ya vyanzo vya ndani unaimarika na kuwa wa ufanisi zaidi. Mikakati hiyo ni pamoja na ununuzi wa gari moja litakalokuwa likifanya kazi ya kufuatilia ukusanyaji wa vyanzo vya mapato ili kuongeza nguvu ya ukusanyaji wa mapato ya vyanzo vya ndani, kuboresha majengo ya kutolea huduma za afya na elimu, kuboresha miundombinu ya masoko, likiwemo soko la samaki dunda pia kufanya uhamasishaji wa Wananchi juu ya uchangiaji wa miradi ya maendeleo ikiwa ni pamoja na kuwashirikisha wahisani na wadau wa maendeleo.

Vipaumbele vya miradi ya maendeleo vya mpango na bajeti kwa mwaka wa fedha 2019/2020 vimejikita katika sekta za Elimu, Afya, Maji, Ujenzi, Ardhi na maliasili, Utawala, Maendeleo ya Jamii, Fedha na biashara, Uvuvi, Mifugo, Sekta ya Kilimo.

Katika kipindi cha Mwaka wa fedha 2018/2019 Halmashauri iliidhinishiwa kukusanya na kutumia kiasi cha Tshs 32,731,967,034.00 na hadi kufikia Desemba, 2018 Halmashauri ilikuwa imekusanya kiasi cha Tshs. 13,336,944,161.00 ikiwa ni sawa na asilimia 41 ya mapato yote yanayojumuisha mapato ya ndani, ruzuku ya matumizi ya kawaida na miradi ya maendeleo na Tshs. 12,415,892,926.00 zilitumika sawa na asilimia 38 ya makisio.