BIDHAA ZILIZOKAMATWA KWA KUKWEPA USHURU ZAGAWIWA MASHULENI

Posted on: October 23rd, 2020

Bandari ndogo ya Bagamoyo imekuwa ikifanya kazi ya kusafirisha na kupokea bidhaa mbali mbali kwa ufanisi mkubwa huku Mamlaka ya mapato Nchini (TRA), Kitengo cha forodha Wilayani hapa kikihakikisha bidhaa zote zinazopitishwa katika bandari hiyo zinalipiwa ushuru ili kuimarisha ukusanyaji mapato Nchini.

Katika kuhakikisha ukusanyaji mapato ya Serikali kupitia ushuru wa kodi za bidhaa zinazopitishwa katika bandari ya Bagamoyo, Kitengo cha forodha kimekuwa kikifanya doria za mara kwa mara za majini na Nchi kavu, zinazosaidia kuimarisha ukusanyaji mapato.

Akitoa taarifa hiyo leo Oktoba 23, 2020 Meneja Forodha, Bandari ya Bagamoyo, Bw. Sebastian Malle amesema katika nyakati tofauti tofauti, doria hizo zimepelekea kukamatwa kwa bidhaa mbalimbali za magendo, zikiwemo bidhaa za sukari na Mchele ambazo zilikamatwa kwa kukwepa ushuru na kupita njia za panya.

“Tumekamata kiasi cha Kilo 345 za Sukari na Kilo 300 za Mchele aina ya Basmati,  na tunapokamata bidhaa hizi za magendo huwa tunafanya mawasiliano na Kamishna Mkuu wa Mamlaka ya Mapato Nchini, Mamlaka ya Chakula na Dawa Nchini (TMDA) na Taasisi ya udhibiti ubora Nchini (TBS), na baada ya wote kujiridhisha na ubora wa bidhaa zilizokamatwa, bidhaa zinazopasi ubora hutolewa kibali na Kamishna Mkuu wa Mamlaka ya Mapato Nchini cha kugawiwa kwa Taasisi zinazotoa huduma kwa Wananchi kama tunavyofanya leo na zile zinazoshindwa kupasi katika viwango vya ubora huwa tunafanya utaratibu wa kuziteketeza”. Amesema Bw. Malle

Wanafunzi wa Shule ya Sekondari Kiromo ni baadhi ya wanufaika wa mgao huo ambapo Mwalimu Mkuu wa Shule hiyo, Mwl. Hosea Maganga ameipongeza Mamlaka ya mapato Kitengo cha Forodha Wilaya ya Bagamoyo kwa kufanya kazi zake kwa weledi mkubwa lakini pia kwa kuwakumbuka na wao kunufaika katika mgao huo uliofanyika katika Ofiosi za Mkuu wa Wilaya ya Bagamoyo.

Taasisi zilizonufaika na mgao huo ni pamoja na Shule zote za Sekondari za Kata Wilayani Bagamoyo, Taasisi ya Magereza na Taasisi ya kutoa huduma za kidini iitwayo Ramiya.