DC BAGAMOYO ASISITIZA WELEDI KATIKA UTUMISHI WA UMMA

Posted on: August 28th, 2018

Mkuu wa Wilaya ya Bagamoyo Mhe. Zainabu Mfaume Kawawa, amezungumza na watumishi wa Umma wa Wilaya ya Bagamoyo na kusisitiza uwajibikaji unaozingatia weledi na kujituma pasi na kusubiri kusukumwa na viongozi.
Mhe. Kawawa ameyasema hayo mara baada ya kuitisha kikao maalumu cha kujitambulisha kwa watumishi wa umma wa Wilaya ya Bagamoyo kilichofanyika katika ukumbi wa Halmashauri ya Wilaya ya Bagamoyo leo Agosti 28, 2018.
“Watumishi nasisitiza kila mmoja wetu atimize majukumu yake kwa kujituma, weledi na kwa kuzingatia wakati, toeni mrejesho wa majukumu na maelekezo mnayopatiwa na viongozi, mnapokutana na changamoto ziwasilisheni kwa wakubwa wenu wa kazi ili wawasaidie kuzitafutia ufumbuzi” amesema Mhe. Kawawa.
Anaongeza kusema kuwa, Serikali ya Awamu ya tano ni Serikali inayofanya kazi kwa kutarajia matokeo chanya, hivyo Watumishi wa umma kila mmoja katika utekelezaji wa majukumu yake ni mtatuzi wa matatizo na kero za wananchi na kwa kufanya hivyo wanalinda heshima ya Serikali na kuleta matokeo chanya kwa Wananchi hasa wanyonge na wa hali ya chini.
Mhe. Kawawa pia, ametumia fursa hiyo kukemea tabia ya Wafugaji wa kimang’ati katika Wilaya ya Bagamoyo kujichukulia sheria mkononi na kuwavamia, kuwapiga wakulima, lakini akakemea pia watumishi wa umma ambao kwa namna moja wanachagiza migogoro ya ardhi na kuongeza kuwa hatasita kuwachukulia hatua kali watumishi watakaobainika kuwa chanzo cha migogoro ya Ardhi Wilayani Bagamoyo.
“Nawaagiza Maafisa ardhi wa Halmashauri za Chalinze na Bagamoyo kuanisha migogoro yote ya ardhi katika maeneo yenu, ikionesha chanzo cha mgogoro, kama imetatuliwa au la na kwa migogoro ambayo haijatatuliwa muoneshe mpango maalumu wa kutatua migogoro hiyo, pia hakikisheni kuwa mnaandaa na kuwasilisha ofisini kwangu mpango wa matumizi bora ya ardhi wa maeneo yote yenye migogoro ya ardhi Wilayani Bagamoyo” Amesema Mhe. Kawawa.
Aidha, Mhe. Kawawa ametaja maeneo sita ya kipaumbele katika uongozi wake akiwa Mkuu wa Wilaya ya Bagamoyo na kuyabainisha kuwa ni kuimarisha ulinzi na usalama wa Wananchi na mali zao, Kusimamia ukusanyaji mapato ya ndani ya Halmashauri, Uongozi shirikishi unaozingatia kushuka hadi ngazi ya chini kabisa kwa Wananchi na kusikiliza kero na matatizo yao na kuyatafutia ufumbuzi wa kudumu, kusimamia na kuendeleza shughuli za maendeleo na kukuza uchumi za vikundi vya Wanawake na Vijana na mwisho ni kuitangaza Bagamoyo kitaifa na Kimataifa kwa kasi hususani vivutio vya kitalii na miradi ya maendeleo inayotekelezwa na Serikali katika Wilaya ya Bagamoyo.
Nao Wakurugenzi wa Halmashauri mbili zinazounda Wilaya ya Bagamoyo, Mkurugenzi wa Halmashauri ya Wilaya ya Bagamoyo Bi. Fatuma Omari Latu na Mkurugenzi wa Halmashauri ya Chalinze Bi. Amina Mohamed Kiwanuka, wamesema wameyapokea maagizo na maelekezo hayo ya Serikali na kwamba wako tayari kusimamia utekelezaji wake huku wakimuahidi Mhe. Kawawa ushirikiano na kumuunga mkono katika kuhakikisha Bagamoyo inapiga hatua katika sekta zote muhimu hususani Sekta za Uchumi, Afya na Elimu.