DC KAWAWA AFANYA MIKUTANO KUTATUA KERO ZA WANANCHI WA KATA ZA MAGOMENI NA DUNDA

Posted on: June 12th, 2020

Kila siku ya Jumanne Mkuu wa Wilaya ya Bagamoyo, Mhe. Zainab Kawawa amejiwekea utaratibu wa kusikiliza kero na malalamiko toka kwa wananchi wa Bagamoyo na kuzitaftia ufumbuzi akishirikiana na wataalam wa Halmashauri ya Wilaya ya Bagamoyo

Katika kuongeza wigo huo na kupunguza zaidi kama si kumaliza kabisa kero za wananchi, Mkuu wa Wilaya ya Bagamoyo Mhe. Zainab Kawawa, amesogea karibu zaidi na Wananchi kwa kuwafata wananchi hao katika Kata zao na kufanya mikutano maalum ya kuzungumza na Wananchi na kusikiliza kero zao na kuzitatua papo kwa papo

Siku ya tarehe 11/06/2020 Mkuu wa Wilaya amefanya mikutano miwili ya kusikiliza kero za wananchi katika Kata za Magomeni na Dunda ambapo Wananchi wamepata fursa ya kuwasilisha kero na malalamiko yao mbali mbali na Mkuu wa Wilaya kuzitatua papo hapo jambo lililowafurahisha sana Wananchi hao.

Ndg. Mohamed Said Mkazi wa Sanzale katika mkutano huo amelalamikia ukosefu wa Shule ya Msingi katika eneo la Sanzale, jambo linalowafanya watato hao kutembea umbali mrefu kufata huduma ya elimu katika Shule ya Msingi Kidongo chekundu

Ndg. Mohamed Anaongeza, “Mhe. Mkuu wa Wilaya wakazi wa Sanzale tunapata tabu sana na uwepo wa dampo katika eneo la makazi yetu, dampo limejaa sana na taka zinamwagwa barabarani jambo ambalo pia linahatarisha sana afya za wakazi wa Wananchi”

Akijibu kero hizo Mhe. Zainab Kawawa amewataka wakazi wa Sanzale ambao wamepewa eneo lenye ukubwa wa ekari 67 na Mhe Rais Mwaka 2017, kuhakikisha wanatenga ardhi kwa ajili ya miundo mbinu ya huduma za jamii ikiwemo, Shule, zahanati, soko nk, ili Eneo la Sanzale lipate eneo la kujengwa Shule ya Msingi na kumaliza kero hiyo kwa watoto wa maeneo hayo

Kuhusiana na Uwepo wa dampo lililojaa katika maeneo ya makazi ya watu katika eneo hilo, Kaimu Mkuu wa Idara ya Mazingira akizungumza kwa niaba ya Mhe. Mkuu wa Wilaya amesema, mkakati wa muda mfupi wa kukabiliana na kero ya dampo katika eneo hilo ni kuhakikisha taka zinasambazwa kila baada ya miezi mitatu, aidha Halmashauri katika bajeti ya Mwaka 2020/2021 imetenga fedha kiasi cha Shilingi Milioni 20 kwa ajili ya hatua ya upimaji wa athari za kimazingira katika eneo la kidomole lililopo katika Kata ya Fukayosi kwa ajili ya kuhamisha dampo hilo toka katika eneo la Sanzale na kulihamishia eneo la kidomole.

Aidha kero za Wanachi wa Kata za Magomeni na Kata ya Dunda ambao walishiriki mikutano hiyo, zimeonekana Dhahiri kuelemea zaidi katika migogoro ya ardhi, Wanawake, wazee na watoto kutakiwa kulipia huduma za Afya wafikapo Hospitali ya Wilaya, ukosefu wa umeme katika eneo la bon’gwa, kutoboreshwa kwa Mji Mkongwe wa Bagamoyo kuwa Mji wa kisasa zaidi ili kuongeza mapato ya Serikali, uboreshwaji wa miundo mbinu ya mifereji ya maji taka katika mitaa, kutopatiwa vibali vya kufanya sherehe mbalimbali za kijamii, ukosefu wa ajira kwa vijana, Urasimu wa utoaji vitambulisho katika Ofisi za NIDA, na uchafu katika mji wa Bagamoyo, hali kadhalika, Mkuu wa Wilaya ya Bagamoyo Mhe. Zainab Kawawa alitolea ufafanuzi kero hizo zote na kuzitatua kupitia mikutano hiyo aliyofanya katika Kata hizo hapo jana.

Mkuu wa Wilaya ya Bagamoyo, Mhe Zainab Kawawa alimaliza Mikutano hiyo kwa kuwakaribisha Wananchi Ofisini kwake kila siku ya Jumanne kuanzia saa 02:00 Asubuhi hadi saa 9:30 jioni kwani siku hiyo ameitenga maalum kwa ajili ya kusikiliza kero na malalamiko ya Wananchi akishirikiana na wataalam wa Halmashauri.