KAMPUNI YA MAMBA CEMENT YATOA MSAADA WA VINAWIA MIKONO KWA VYUO VIKUU NA SEKONDARI ZA BAGAMOYO

Posted on: June 4th, 2020

Ikiwa ni siku tatu tu zimepita tangu Serikali kuruhusu Vyuo vikuu na Shule za Sekondari zenye wanafunzi wa kidato cha sita kufunguliwa kote Nchini, Mkuu wa Wilaya ya Bagamoyo Mhe. Zainab Kawawa, leo amepokea msaada wa matanki 22 ya maji, yenye stendi, ndoo na mabeseni ya kunawia mikono kwa ajili ya kusaidia wanafunzi hao kupata sehemu za kunawia mikono wawapo Vyuoni na Shuleni ili kuendelea kujikinga na maambukizi ya ugonjwa wa corona.

Akizungumza mapema leo Ofisini kwake mara baada ya kupokea msaada huo, Mhe. Zainab Kawawa amesema baada ya Serikali kutangaza kufungua Vyuo Vikuu na Shule za Sekondari zenye Wanafunzi wa kidato cha sita kote Nchini, yeye binafsi aliamua kuomba msaada huo toka kampuni ya Mamba Cement iliyopo Wilayani hapa ili kusaidia katika mapambano dhidi ya ugonjwa wa corona.

“Nawashukuru sana kampuni ya Mamba cement kwa kupokea ombi langu na kutuletea msaada huu ambao ama kwa hakika umekuja kwa haraka kuliko nilivyotarajia, nawashukuru sana kwa kuona uhitaji wetu na kuleta msaada huu Wilayani Bagamoyo, kwani vinawia mikono hivi vitasaidia sana wanafunzi ambao wamerudi vyuoni na Shuleni kuendelea kujikinga dhidi ya maambukizi ya ugonjwa wa homa kali ya mapafu unaosababishwa na virusi vya Corona” Amesema Mhe. Zainab

Aidha, Mkuu wa kitengo cha Uhusiano wa Kampuni ya Mamba Cement Bw. Aboubakar Mlawa mara baada ya kukabidhi msaada huo kwa Mkuu wa Wilaya ya Bagamoyo, amesema wao wameitika wito kwakuwa wana mahusiano mazuri na Uongozi wa Wilaya ya Bagamoyo lakini pia huu ni wakati sahihi wa kurudisha fadhila zao kwa jamii inayowazunguka kwa kushirikiana nayo katika mapambano dhidi ya ugonjwa wa Corona na kuongeza kuwa vinawia mikono hivyo vina thamani ya shilingi Milioni 5.500,000/-

Naye Kaimu Mkuu wa Chuo cha Ukutubi na Uhifadhi nyaraka Nchini kilichopo Wilayani hapa, Bi. Victoria Kessy akizungumza kwa niaba ya Wakuu wa Vyuo na Shule za Sekondari zilizonufaika na msaada huo, msaada huo umekuja kwa wakati mwafaka na wataendelea kutoa elimu kwa wanafunzi wao kuendelea kujikinga na maambukizi ya ugonjwa wa Corona kwa vitendo kwa kutumia msaada wa vinawia mikono hivyo.

Baada ya Serikali kuruhusu Vyuo na Shule hizo kufunguliwa, Halmashauri ya Wilaya ya Bagamoyo imepokea Wanafunzi katika Vyuo vikuu 8 na Shule 9 za Sekondari na Wanafunzi wanaendelea na masomo kama ilivyokuwa hapo awali.