KILIMO CHA MUHOGO KUKOMBOA WAKULIMA BAGAMOYO

Posted on: March 7th, 2019

KILIMO CHA MUHOGO KUKOMBOA WAKULIMA BAGAMOYO

Wakulima Wilayani Bagamoyo wamehimizwa kuongeza uzalishaji wa zao la Muhogo, kwani zao hilo kwa sasa, ni zao maalumu la kibiashara na ukombozi wa Mkulima Wilayani humo.

Hayo yamesemwa na Mwenyekiti wa Halmashauri ya Wilaya ya Bagamoyo, mapema jana alipokuwa akizungumza na Wananchi, Waheshimiwa Madiwani na Wakuu wa Idara katika kikao maalum cha Baraza la Waheshimiwa madiwani kilichoketi kwa siku mbili, kuanzia tarehe 05 na 06 Machi, 2019.

Mhe. Mwenyekiti Alli Alli Issa ambaye pia ni diwani wa Kata ya Fukayosi ameeleza kupitia mkutano huo wa baraza la Waheshimiwa madiwani kuwa, zao la Muhogo ndani ya Halmashauri ya Wilaya ya Bagamoyo sasa ni zao la biashara na ukombozi kwa Wakulima wa Bagamoyo baada ya kuikaribisha kampuni ya Dar Canton Investment Limited ambayo ni kampuni ya Uwekezaji katika zao la muhogo inayotarajiwa kuanza kufanya kazi ndani ya Halmashauri ikijikita katika ununuzi na uchakataji wa muhogo.

“Waheshimiwa Madiwani wenzangu twende tukawahimize Wananchi kujikita katika uzalishaji wa zao mhogo bora, Wataalamu mtusaidie kufika Vijijini kuwaelimisha Wananchi juu ya kutumia mbegu bora za mhogo na kulima kilimo kinachozingatia kanuni bora za kilimo ili wapate tija katika mazao yao, na kunufaika na ujio wa mwekezaji huyu aliye tayari kununua mhogo kwa Wananchi kuanzia sasa na pale ujenzi wa kiwanda cha uchakataji mhogo utakapokamilika ni wazi Wananchi wetu watanufaika zaidi kwa kuuza mhogo kiwandani” Amesema Mhe. Alli Alli Issa.

Akizungumza katika mkutano huo, Mkurugenzi wa kampuni ya Dar Canton Investment Limited amesema kampuni imepata eneo lililopo Kata ya Makurunge, katika Kitongoji cha Kifude ambapo imeshaanza kufanya upembuzi yakinifu ili kuanza ujenzi wa kiwanda cha uchakataji wa mhogo na kwamba kwa sasa kampuni inaendelea kununua mhogo mkavu katika maeneo mbali mbali ndani ya Halmashauri na kiwanda kitakua na uwezo wa kununua tani 120 za mhogo kwa siku mara kitakapoanza uzalishaji wake, na akaongeza kuwa kwa sasa tayari wameanza ununuzi wa mhogo kwa wakulima mbalimbali ndani na nje ya Halmashauri hivyo Wananchi waendelee na uzalishaji wa mhogo kwani tayari kuna soko la uhakika kupitia kampuni yao.

Baraza la Waheshimiwa madiwani la Halmashauri ya Wilaya ya Bagamoyo limeketi kwa siku mbili kuanzia tarehe 05 na 06 machi, 2019 kujadili taarifa mbalimbali za utekelezaji za Halmashauri kwa robo ya pili kwa Mwaka wa fedha 2018/2019.