KLABU ZA HAKI ZA BINADAMU KUANZISHWA MASHULENI

Posted on: November 9th, 2020

Kituo cha Sheria na Haki za Binadamu (LHRC), katika kutekeleza majukumu yake ya kuijengea jamii uwezo wa kuzifahamu Haki na Wajibu wa Jamii juu ya Haki hizo, kimeanzisha programu maalum ya kuifikia jamii kwa haraka zaidi kupitia kundi la watoto na Vijana ambao watapatiwa mafunzo maalumu juu ya Haki za Binadamu hususani Haki za Watoto.

DSC_0151.JPG

Kundi hili la Watoto na Vijana linaaminika kuwa kundi muhimu hasa kwa namna ambavyo wakipatiwa elimu juu ya Haki za Binadamu linaweza kusambaza elimu hiyo kwa jamii nzima kwa haraka zaidi kwa kuibeba elimu hiyo na kuifikisha kwa makundi mengine yanayowazunguka katika jamii kama wazazi, walezi na kila mwanajamii aliye na uhusiano na kundi hili la Watoto na Vijana.

Katika kufanikisha hili Kituo cha Sheria na Haki za Binadamu (LHRC) kimeweka kambi Wilayani Bagamoyo ili kuendesha mafunzo maalumu ya siku 03 kwa Maafisa elimu Kata wa Kata zote 11 za Halmashauri ya Wilaya ya Bagamoyo na Maafisa Ustawi wa Jamii wanaoshughulikia dawati la marekebisho ya Tabia na Haki za Mtoto Kisheria, mafunzo yanayolenga kuwajengea uwezo Wataalamu hao wa Halmashauri kusimamia uendeshaji wa Klabu zote za Haki za Binadamu zilizoanzishwa Mashuleni katika Kila Shule ya Msingi na Sekondari katika Kata zote 11 za Halmashauri ya Wilaya ya Bagamoyo.

Akifungua mafunzo hayo maalumu Mkurugenzi Mtendaji wa Halmashauri ya Wilaya ya Bagamoyo Bi. Fatuma O. Latu, ameshukuru Kituo cha Sheria na Haki za Binadamu kufikiria kuanzisha Klabu hizo Mashuleni kwani ni Klabu hizo zitakuwa msaada mkubwa kwa wanafunzi hao kupata uelewa wa namna ya kujilinda dhidi ya vitendo vya ukatili na wajibu wao katika kusimamia haki zao.

DSC_0184.JPG

“Tunaahidi kushirikiana nanyi katika program hii ili kwa pamoja tuweze kuwasaidia watoto wetu kuzifahamu Haki zao za Msingi hii itawasaidia sana kujilinda dhidi ya vitendo vya ukatili na sisi kama Halmashauri tutaiweka shughuli hii katika mpango na bajeti wa Halmashauri ili kuongeza nguvu na kuhakikisha programu hii inafanikiwa kuwakomboa Watoto na Vijana wetu waliopo Mashuleni na majumbani dhidi ya vitendo vya Ukatili na kujenga Taifa imara na jamii yenye uelewa juu ya Haki za Binadamu.

Klabu za Haki za Binadamu (Haki za Watoto) zitaanzishwa katika Shule zote 77 za Msingi na Sekondari za Serikali na binafsi Wilayani Bagamoyo baada ya kuonekana uhitaji mkubwa wa uanzishwaji wa Klabu hizo kutokana na kukithiri kwa vitendo vya ukatili dhidi ya watoto, hususani kuongezeka kwa vitendo vya ubakaji, ulawiti na mimba za utotoni.

Ndg. Ally Seif Ramadhani ni Mratibu wa Programu ya Vilabu vya Haki za Binadamu na Vijana kutoka Kituo cha Sheria na Haki za Binadamu anaeleza malengo ya program hii kuwa ni kuwajengea uwezo wanafunzi juu ya Haki za Binadamu hususani Haki za Watoto na wajibu ili kuepukana na vitendo vya ukatili na namna ya kutoa taarifa mahala panapohusika pale wanapofanyiwa vitendo vya Ukatili.

Wakati huo huo Mratibu wa Dawati la Marekebisho ya tabia na Haki za Mtoto Kisheria Wilaya ya Bagamoyo Bi. Flora Warioba amesisitiza juu ya umuhimu wa uanzishwaji wa klabu za Haki za Binadamu (Haki za Mtoto) Mashuleni kwani zitakuwa kitovu cha kukomesha vitendo vya ukali dhidi ya watoto na Vijana Wilayani Bagamoyo na kuahidi kusimamia program hiyo kikamilifu ili ilete mafanikio yanayotarajiwa katika jamii ya Wana Bagamoyo.