KONGOLE BAGAMOYO KUPATA HATI SAFI KWA MIAKA MINNE MFULULIZO:RC NDIKILO

Posted on: May 8th, 2020

Halmashauri ya Wilaya ya Bagamoyo imefanikiwa kupata Hati safi kwa ukaguzi wa hesabu za Mwaka 2018/2019 uliofanywa na Mkaguzi na mdhibiti Mkuu wa Hesabu za Serikali (CAG).

Taarifa hiyo imetokewa katika Mkutano Maalum wa Baraza la Waheshimiwa Madiwani wa Halmashauri ya Wilaya ya Bagamoyo, na Mkaguzi toka Ofisi ya Taifa ya Ukaguzi na Udhibiti wa Hesabu za Serikali (CAG) wa Mkoa wa Pwani Bi. Mwajuma Kwipunda, alipokuwa akisoma taarifa ya Ukaguzi iliyofanywa na Ofisi yake kwa hesabu za Mwaka wa fedha 2018/2019 katika Halmashauri ya Wilaya ya Bagamoyo.

Nae Mkuu wa Mkoa wa Pwani, Mhe. Mhandisi Evarist Ndikilo ameupongeza uongozi wa Halmashauri ya Wilaya ya Bagamoyo kwa kufanya kazi kwa weledi na kujituma kulikopelekea mafanikio hayo.

“Nawapongeza sana kwa kufanikiwa kupata hati safi kwa miaka minne mfululizo, haya matokeo ya ufanyaji kazi kwa ushirikiano baina ya Mkurugenzi, Waheshimiwa Madiwani na watendaji ambao mmefanya kazi kwa kuzingatia, weledi, sheria, kanuni na taratibu za Utumishi wa umma, Hongereni sana” Amesema Mhe. Ndikilo

Ameongeza, “Hii inaonesha uwezo wenu mkubwa wa kusimamia Ilani ya Chama cha Mapinduzi katika Halmashauri ya Wilaya ya Bagamoyo kama inavyoonekana na kusomeka katika Ibara ya 148 Uk 162, hakika mmesaidia Mhe. Rais John Pombe Magufuli kutekeleza Ilani ya Chama cha Mapinduzi kwa kusimamia shughuli zote za Serikali kwa weledi katika Halmashauri pia kwa kuhakikisha fedha za utekelezaji wa miradi ya maendeleo zinatumika kukamilisha lengo lililokusudiwa la miradi hiyo kutekelezwa kwa wakati hivyo kumaliza kero kwa Wananchi

Mhe Ndikilo ametumia fursa hiyo pia kutoa maagizo kwa Uongozi wa Halmashauri ya Wilaya ya Bagamoyo kuhakikisha kuwa hoja 38 ambazo bado hazijaungwa zinajibiwa na kwasilishwa Mkoani ndani ya Siku 7 huku akisisitiza watendaji wa Halmashauri kuendelea kufanya kazi kwa weledi ili kuepuka kuzalisha hoja na kuagiza kuwa Mtendaji yeyote wa Halmashauri, atakayezalisha hoja bila sababu za msingi na kuisababishia Halmashauri hasara, basi Uongozi wa Halmashauri kupitia baraza la waheshimiwa Madiwani, usisite kumchukulia Mtendaji huyo hatua za kinidhamu na za kisheria mara moja ili iwe fundishio kwa watendaji wengine.

Nae Mwenyekiti wa Halmashauri ya Wilaya ya Bagamoyo, Mhe. Alli Alli Issa ambaye pia ni diwani wa Kata ya Fukayosi, amesema watayafanyia kazi kikamilifu maagizo yaliyotolewa na Mhe. Mkuu wa Mkoa ili kuimarisha utendaji kazi wa Halmashauri na kuhakikisha Halmashauri inaendelea kupata hati safi kwa miaka ijayo hivyo akatumia fursa hiyo kumwagiza Mkurugenzi wa Halmashauri ya Wilaya ya Bagamoyo kuhakikisha hoja hizo zinafungwa ndani ya siku7 kama ilivyoagizwa na Mhe. Mkuu wa Mkoa na majibu yake kuwasilishwa Mkoani