MAAFISA UGANI BAGAMOYO WAPATA ELIMU JUU YA KILIMO CHA KISASA CHA MIWA

Posted on: September 17th, 2020

Katika kutekeleza maagizo maalum ya Waziri Mkuu wa Jamhuri ya Muungano wa Tanzania, Mhe. Kassim majaliwa Majaliwa aliyoyatoa tarehe 18 Agosti, 2020 alipotembelea kiwanda cha Bagamoyo Sugar Company Limited Makurunge, katika ziara maalum ya kuona uendelevu wa mradi huo, Idara ya Kilimo Halmashauri ya Wilaya ya Bagamoyo, imewapeleka Maafisa ugani kutoka katika Kata zote 11 za Halmashauri ya Wilaya ya Bagamoyo katika kiwanda cha Bagamoyo Sugar ili kujionea kilimo cha miwa kinavyotekelezwa kisasa katika mradi huo ili waweze  kuhamasisha jamii wanayoihudumia katika Kata zao, kuanza kufikiria kuhusu kilimo cha miwa,  kwani Kiwanda cha Bagamoyo Sugar katika awamu ya pili ya utekelezaji wa mradi huo, itatumia utaratibu wa wakulima wa nje, almaarufu kama “Outgrowers scheme”

Kwa muda mrefu Wakulima wa Bagamoyo wamejikita katika zao la korosho, mihogo na mananasi kibiashara, lakini ni ukweli usiopingika kuwa uwepo wa kiwanda cha Bagamoyo Sugar Co. ltd, ni fursa nyingine kwa wakulima wa Bagamoyo kuondokana na umasikini kwa kujikita katika kilimo cha miwa, kwani kiwanda hiki kitawapatia fursa ya uhakika wakulima hao kuuza miwa kiwandani hapo ili itumike katika kiwanda cha sukari kinachotarajiwa kuanza uzalishaji mnamo Mwezi Novemba 2022.

Maafisa ugani toka Kata 11 za Halmashauri ya Wilaya ya Bagamoyo wakiwa katika kiwanda cha Bagamoyo sugar, wamepata mafunzo maalum juu ya namna bora ya kulima zao la miwa katika ukanda huu wa Pwani, iliyotolewa na Bw. Naarayan Krishnasamy ambaye ni Meneja mradi upande wa Shamba la miwa kisha kufanya ziara fupi kujionea namna kilimo cha miwa kwa njia ya umwagiliaji kinavyofanyika shambani hapo, upandaji wa miwa kisasa, nursery za miwa na aina mbalimbali za mbegu za miwa zikiwa shambani na mwisho walipata elimu ya namna ya kupima udongo na maji katika maabara maalum ya udongo na maji iliyopo katika mradi wa Bagamoyo Sugar Company Limited.