MRATIBU WA MRADI WA MARCOSIO TAFIRI AONGOZA WASHIRIKI WA WARSHA KUTEMBELEA WAVUVI WILAYA YA BAGAMOYO...

Posted on: May 29th, 2025

Mratibu wa Mradi wa MarCOSIO kutoka Taasisi ya Utafiti wa Uvuvi Tanzania (TAFIRI), Dkt. Happy K. Peter, ameongoza timu ya washiriki wa warsha ya MarCOSIO katika ziara maalum wilayani Bagamoyo, ikiwa ni sehemu ya siku ya nne ya warsha hiyo inayowakutanisha wataalamu mbalimbali wa masuala ya bahari na uvuvi kutoka barani Afrika.

Warsha hiyo imewakutanisha washiriki kutoka zaidi ya nchi tisa za Afrika, zikiwemo Namibia, Kenya, Madagascar, Mauritius, Comoro, Msumbiji, Afrika Kusini, na Ghana. Katika ziara hiyo, washiriki walitembelea ofisi ya Mkurugenzi wa Wilaya ya Bagamoyo, Bw Shauri Selenda, kwa lengo la kujitambulisha rasmi na kueleza madhumuni ya ziara yao wilayani humo.

Bw Selenda aliipongeza TAFIRI kwa kuandaa warsha hiyo na kuichagua Bagamoyo kama sehemu ya mafunzo ya vitendo kwa washiriki. Alieleza kuwa Serikali ya Awamu ya Sita, chini ya uongozi wa Mheshimiwa Rais Dkt. Samia Suluhu Hassan, imejipanga kikamilifu kuendeleza sekta ya uvuvi na kuimarisha uchumi wa buluu. Aidha, alibainisha kuwa Soko la Samaki la Bagamoyo ni la pili kwa ukubwa nchini baada ya lile la Feri jijini Dar es Salaam, na Halmashauri imejipanga vyema katika kuhudumia wananchi, hususan wavuvi.

Kwa upande wake, Dkt. Happy K. Peter alisema kuwa ziara hiyo inalenga kuwapa washiriki uzoefu wa moja kwa moja kuhusu shughuli za uvuvi na mazingira ya pwani ya Tanzania. Pia, washiriki walipata fursa ya kutembelea maeneo ya kihistoria yaliyohusiana na biashara ya pembe za ndovu na utumwa katika kipindi cha ukoloni, ikiwa ni sehemu ya kujifunza historia ya eneo hilo.

Aidha washiriki hao waliwatembelea na wavuvi wa Bagamoyo na kushuhudia maisha yao ya kila siku pamoja na changamoto wanazokabiliana nazo. Hii ni sehemu ya juhudi za mradi wa MarCOSIO katika kukuza uelewa wa pamoja juu ya matumizi endelevu ya rasilimali za bahari na utunzaji wa mazingira ya pwani kwa maendeleo jumuishi ya jamii za ukanda wa bahari.