RAS MPYA PWANI AFANYA ZIARA YA KUJITAMBULISHA BAGAMOYO

Posted on: May 15th, 2020

Katibu Tawala Mkoa wa Pwani Dkt. Delphine Magere, amefanya ziara ya kujitambulisha leo katika Halmashauri ya Wilaya ya Bagamoyo, na kuzungumza na Watumishi wa Halmashauri wakiongozwa na Mkurugenzi wa Halmashauri ya Wilaya ya Bagamoyo, Bi. Fatuma O. Latu

.

Katika ziara hiyo Katibu Tawala Mkoa alianzia ziara yake Ofisi ya Mkuu wa Wilaya ya Bagamoyo ambako alipokelewa na Mkuu wa Wilaya ya Bagamoyo Bi. Zainab Kawawa kabla ya  kupokea taarifa ya utekelezaji wa shughuli za Serikali Kiwilaya, Taarifa iliyosomwa mbele yake na Katibu Tawala Wilaya Bi. Kasilda Mgeni.

Aidha, katika ziara hiyo, Katibu Tawala Mkoa, Dkt. Delphine Magere amesisitiza ushirikiano baina ya Watumishi wa Halmashauri na Ofisi ya Mkuu wa Wilaya na Ofisi ya Mkuu wa Mkoa wa Pwani ili kurahisisha utendaji kazi na utoaji huduma kwa wananchi.

Dkt. Magere pia ametumia fursa hiyo kueleza vipaumbele vyake kuwa ni kuhakikisha Halmashauri inaimarisha ukusanyaji mapato ya ndani, Kuimarisha utoaji huduma za utalii na kutunza miundombinu ya utalii, kuimarisha na kuboresha utoaji huduma kwa wafanyabiashara wadogo, wa kati na wakubwa, kuboresha miundombinu ya uwekezaji kwa wawekezaji wa ndani na wan je, kuboresha utoaji huduma za ugani kwa wakulima na wafugaji na mwisho ni uboreshaji wa fursa na miundombinu ya uwekazaji wa viwanda, kwani shughuli hizi za ni shughuli mama katika ukuzaji uchumi wa Halmashauri, Mkoa na Taifa kwa ujumla.

Kabla ya uteuzi wake Dkt Magere alikuwa akitekeleza majukumu yake Ofisi ya Rais Ikulu akishughulikia masuala ya Uchumi na amechukua nafasi ya Bi. Theresia Mmbando ambaye amestaafu.