TEMESA USO KWA USO NA WATAALAM WA HALMASHAURI YA BAGAMOYO

Posted on: September 22nd, 2020

Wakuu wa Idara na vitengo wa Halmashauri ya Wilaya ya Bagamoyo leo Septemba 22, 2020, wamefanya kikao maalum na wataalam kutoka Wakala wa ufundi na Umeme (TEMESA) Mkoa wa Pwani ili kujadiliana changamoto mbalimbali zinazotokea pale Halmashauri inapohitaji huduma za utengenezaji wa magari toka kwa wakala hao na kujadili namna bora ya ufumbuzi wa changamoto hizo kwa pamoja.

Mkurugenzi Mtendaji wa Halmashauri ya Wilaya ya Bagamoyo, Bi. Fatuma O. Latu, aliyeongoza kikao hicho amesema, imekuwa vyema kuketi katika meza moja kujadili changamoto hizo badala ya utaratibu wa barua ambao wamekua wakiutumia mara zote.
“Tunashukuru mmekubali wito wetu wa kufika hapa ili tutafute ufumbuzi wa changamoto tunazokumbana nazo wakati Halmashauri inapohitaji huduma za kutengenezewa magari toka TEMESA, ambapo changamoto kubwa imekuwa ni ucheleweshwaji wa kumalizika kwa kazi, ubora wa vipuri, gharama za vipuri na gharama kubwa za utengenezaji wa magari, tunaamini kikao hiki kitakuwa ni msaada mkubwa kwetu na kitasaidia kupata ufafanuzi wa changamoto hizi na tutazipatia ufumbuzi wa pamoja ili na sisi kama Halmashauri tuendelee kutoa huduma kwa Wananchi kwa wakati hasa pale itakapotuhitaji kutumia magari kutoa huduma hizo” Amesema Mkurugenzi Fatuma.

Nae Meneja wa Wakala wa Ufundi na Umeme (TEMESA) Mkoa wa Pwani, Mhandisi Rehema Juma akizungumza katika mkutano huo ameshukuru uongozi wa Halmashashuri ya Wilaya ya Bagamoyo, kuona umuhimu wa kukaa meza moja ili kujadiliana na kuzitafutia ufumbuzi wa pamoja changamoto zinazojitokeza katika utendaji kazi wa TEMESA wakati wa kutoa huduma hasa za utengenezaji magari ya Halmashauri huku akikiri kuwa TEMESA bado ina mapungufu katika utoaji huduma kwani na wao wanakabiliana na changamoto kadha wa kadha ikiwa ni pamoja ana ucheleweshwaji wa malipo toka kwa taasisi wanazozihudumia, ubora wa vipuri, gharama za vipuri, upungufu wa Watumishi, na kupongeza hatua ya Serikali kuhakikisha vipuri vyote vya magari vitakavyofungwa katika magari kuanzia sasa kuwa vimethibitishwa na TBS, hivyo mamlaka hiyo ya udhibiti ubora kuanzia sasa itakuwa ikifanya kazi bega kwa bega na TEMESA ili kuhakikisha ubora wa vipuri vitakavyofungwa katika magari ya Serikali.

Mhandisi Rehema, pia ametumia fursa hiyo kumwomba Mkurugenzi wa Halmashauri ya Wilaya ya Bagamoyo kumalizia madeni ya utengenezaji magari ambayo bado hayajalipwa TEMESA yanayokaribia Shilingi Milioni 27 katika kipindi cha Mwaka 2017 – 2020 ili Taasisi hiyo iweze kutumia fedha hizo katika uboreshaji wa utoaji huduma zake kwa taasisi zingine za Serikali katika Mkoa wa Pwani.

Mkutano huo umekamilika kwa pande zote mbili kuahidiana ushirikiano katika kutekeleza majukumu ya Serikali ili kurahisisha utoaji huduma kwa wananchi kwa haraka na kwa weledi huku Mkurugenzi Fatuma akiahidi kuweka mkakati maalum wa kumaliza deni hilo haraka iwezekanavyo.