TUTADHIBITI MIANYA YOTE YA UPOTEVU WA MAPATO: MPWIMBWI

Posted on: September 16th, 2020

Mwenyekiti wa Mamlaka ya Mji mdogo Bagamoyo, Mhe. Amiri Mpwimbwi ameyasema hayo leo Septemba 16, 2020 katika mkutano maalum wa baraza la Mji mdogo, uliofanyika katika Ukumbi wa TasuBa Wilayani hapa.

Akiutambulisha mkakati maalum wa Wenyeviti wa mamlaka hiyo waliojiwekea kuhakikisha wanadhibiti mianya yote ya upotevu wa mapato katika maeneo wanayoyasimamia kiuongozi, Mhe. Mpwimbwi amesema kuanzia sasa wamejiwekea mkakati maalum wa kufanya doria kubaini wafanyabiashara wasio waaminifu wanaokwepa kutoa ushuru wa Halmashauri hasa katika maeneo ya uchimbaji mchanga na mnada mkubwa wa samaki katika Pwani ya Bagamoyo Kata ya Dunda.

“Tumeamua na tutahakikisha tunashirikiana kikamilifu na Mkurugenzi Mtendaji kupitia kikosi kazi maalum cha ufuatiliaji mapato ya Halmashauri kuhakikisha wale wote wanaotukwamisha kukusanya mapato kwa usahihi katika vyanzo vya machimbo ya mchanga na mnada wa samaki Dunda tunawabaini na kuhakikisha wanachukuliwa hatua stahiki ili kupandisha ukusanyaji wa mapato ya Halmashauri yetu ya Bagamoyo kwa maendeleo ya wana Bagamoyo wote” Amesema Mhe. Mpwimbwi.

Mkurugenzi Mtendaji wa Halmashauri ya Wilaya ya Bagamoyo kupitia mkutano huo, amewataka Wenyeviti hao kuendelea kumuunga mkono katika suala la ukusanyaji mapato katika maeneo yao na kuhakikisha wakati wote wanatoa ushirikiano katika miradi ya maendeleo inayotekelezwa na Serikali katika ameneo yao kwa kuisimamia  na kushiriki katika kamati za ujenzi wa miradi hiyo inayotekelezwa kwa utaratibu wa ‘force Account’ almaarufu kama Local fundi, ili miradi hiyo ilete tija inayotarajiwa na Serikali katika maeneo yao.

Baraza la Mji mdogo (Bagamoyo) likiongozwa na Mwenyekiti wake Amiri Mpwimbwi, mbali ya kujadili masuala ya ukusanyaji mapato pia limepokea taarifa mbali mbali za utekelezaji wa shughuli za Halmashauri.

Wenyeviti takribani 140 wamepokea taarifa ya mrejesho wa mpango wa bajeti ya Halmashauri kwa Mwaka wa fedha 2020-2021 mapato ya ndani baada ya kupitishwa na bunge.

Taarifa nyingine iliyopkelewa katika mkutano huo wa baraza ni taarifa ya mchanganuo wa fedha za utekelezaji wa miradi ya maendeleo kwa Mwaka wa fedha 2020/2021 na taarifa ya mgao wa fedha za EP4R awamu ya nane 2019-2020.