UJAZAJI WA OPRAS NI LAZIMA KWA MTUMISHI WA UMMA

Posted on: August 13th, 2019

Mkurugenzi wa Halmashauri ya Wilaya ya Bagamoyo Bi. Fatuma O. Latu, ametoa wiki moja kwa watumishi wote wa Halmashauri ya Wilaya ya Bagamoyo kuhakikisha wamekamilisha ujazaji wa fomu ya tathmini ya utendaji wa watumishi wa umma yaani OPRAS.

Hayp yamesemwa leo na Mkurugenzi wa Halmashauri ya Wilaya ya Bagamoyo, Bi. Fatuma O. Latu, katika kikao maalum cha watumishi kinavyofanyika mara moja kwa kila robo kikiwa na lengo la kuwakumbusha watumishi majukumu yao, kuhimiza uwajibikaji na uadilifu katika utumishi, pia kusikiliza kero, malalamiko na changamoto za watumishi na kuzipatia ufumbuzi.

“Kila Mtumishi ahakikishe amejaza fomu ya upimaji wa utendaji kazi yaani OPRAS kwani ndio kipimo pekee kinachotusaidia kujua malengo yako ya kiutumishi na namna ulivyoyatekeleza kwa kuzingatia bajeti ya Halmashauri, mpango mkakati wa Halmashauri na utekelezaji wa Ilani ya uchaguzi, maagizo ya viongozi na shughuli za Kitaifa. Fomu zote za OPRAS zijazwe kikamilifu na kuwasilishwa kwa Wakuu wa Idara husika, na akasisitiza kwamba mtumishi ambaye hatajaza fomu hiyo ya Upimaji yaani OPRAS, hatakuwa na majukumu ya kiutumishi ya kutekeleza kwa Mwaka husika na mtumishi asiye na majukumu ya kutekeleza hastahili kuendelea kuwa mtumishi wa umma” Amesema Bi. Fatuma Latu.

Nae Mkuu wa Idara ya Utumishi na Utawala Ndg. George Mwalukasa, akizungumza katika kikao hicho amesisitiza kuwa ili kuendelea kutekeleza majukumu ya kiutumishi katika utumishi wa umma, ni lazima utendaji wa kila mtumishi uweze kupimwa kwa kujua mtumishi ametekeleza majukumu yapi katika mwaka husika, na kuongeza kwamba watumishi ambao hawatajaza fomu hizo kwa mwaka husika wataondolewa katika orodha ya malipo ya watumishi yaani ‘payroll’ hadi hapo watakapojaza fomu hizo.

Watumishi takribani 180 waliohudhuria kikao hicho zaidi ya kupata maelekezo ya kiutendaji katika utumishi wa umma, pia walipata fursa ya kuwasilisha kero na changamoto wanazokumbana nazo katika utumishi, huku wengi wakilalamikia ucheleweshwaji wa stahili za kiutumishi kama pesa za kujikimu baada ya kuajiriwa, kubadilishiwa mishahara baada ya kupandishwa madaraja na malipo ya saa za ziada kazini, malalamiko ambayo yalitolewa ufafanuzi na Mkurugenzi Mtendaji wa Halmashauri  na kuahidi kusimamia ulipwaji wa stahili zote za watumishi zilizo halali kulingana na upatikanaji wa fedha.