UTENGAJI WA ASILIMIA 5 ZA FEDHA ZA WANAWAKE NI LAZIMA - RC NDIKILO

Posted on: March 9th, 2019

Mkuu wa Mkoa wa Pwani  Mhe. Eng. Evarist Ndikilo ameziagiza Halmashauri zote za mkoa huo kuhakikisha zinatenga asilimia tano ya mapato yao ya ndani kwa ajili ya mfuko wa maendeleo ya wanawawake.

Agizo hilo lilitolewa kwa niaba yake na Mkuu wa Wilaya ya Kibaha, Mhe. Assumpta Mshama kwenye kilele cha maadhimisho ya siku ya wanawake duniani yaliyofanyika kimkoa katika Uwanja wa Saba saba, Picha ya Ndege Kibaha ambapo Mhe. Eng. Evarist Ndikilo alitarajiwa kuwa mgeni rasmi kwenye maadhimisho hayo.

Akizungumza katika maadhimisho hayo, Mhe. Assumpta amesema ni Wakurugenzi wa Halmashauri 4 tu kati ya 9 za Mkoa wa Pwani ndizo ambazo zimetekeleza agizo la utengaji wa asilimia 5 ya mapato ya ndani kwa ajili ya mfuko wa Wanawake na kuzikabidhi fedha hizo kwa vikundi vya Wanawake kwa wakati, kama ilivyoelekezwa na Serikali.

“Wakurugenzi wa Halmashauri, nawaagiza kuwa ni lazima fedha hizi za mfuko wa Wanawake zitengwe na zitolewe kwa wakati na ziwafikie walengwa ili waweze kujiendeleza katika shughuli zao mbalimbali za kiuchumi wanazozifanya na maofisa mnaohusika na ufuatiliaji wa Wanawake hawa, muhakikishe mnazifuatilia fedha hizi kwa ukaribu ili kuona kama zinafanya kazi iliyokusudiwa na wahakikishe wanazifuatilia pia marejesho yake ili ziweze kuwasaida Wanawake wengine” Amesema Mhe. Assumpta.

Alisema katika kuwawezesha wanawake kiuchumi, ni wajibu wa kila Halmashauri kuhakikisha inaandaa na kuendesha mafunzo maalum ya ujasiriamali kwa Wanawake, lengo likiwa ni kuwajengea uwezo katika shughuli zao za kijasiriamali hususani katika usindikaji, ufungaji na masoko ya bidhaa wanazozitengeneza, ili waweze kukua na kuuza bidhaa zao ndani na nje ya Nchii, hii itawasaidia kuwawezesha wanawake kushiriki katika kuleta mabadiliko ya kiuchumi kuanzia ngazi ya familia na Taifa kwa ujumla.

Mhe. Assumpta pia ametumia fursa hiyo kuihamasisha jamii juu ya mambo ya usawa wa kijinsia,kwa kupinga ukatili wa kijinsia, na kuiasa jamii kuwa kila mmoja ashiriki katika vita ya ukatili dhidi ya wanawake na mimba za utotoni.

Maadhimisho ya Siku ya Wanawake Duniani kwa Mwaka huu 2019, yamebebwa na Kauli mbiu inayosema “badili fikra kufikia usawa wa kijinsia kwa maendeleo endelevu” hivyo Mhe. Assumpta akatumia kauli mbiu hiyo pia kuwaasa wazazi, walezi na Wanafunzi wa kike kubadili fikra juu ya umuhimu wa elimu, na kuipa elimu kipaumbele kwa kuhakikisha Wanafunzi wote waliojiunga na masomo hawaachi shule, wanaendelea na masomo ili kujenga taifa lililoelimika baadae.