WANAFUNZI 320 MAPINGA WAPATIWA MAJI SAFI NA SALAMA

Posted on: March 23rd, 2020

Jumla ya Wanafunzi 320 ya Shule ya Sekondari ya Kata ya Mapinga wameondokana na kero ya ukosefu wa maji baada ya taasisi ya It’s time to help foundation Tanzania ikishirikiana na Feza Schools Tanzania kutekeleza mradi wa uchimbaji kisima katika Shule hiyo ambayo haikuwa na huduma ya maji tangu kuanzishwa kwake.

Hafla ya makabidhiano ya mradi huo imefanyika Shuleni hapo siku ya tarehe 23/03/2020 baada ya mradi huo uliogharimu jumla ya Shilingi Milioni 12, kukamilika hivyo kisima hicho kukabidhiwa rasmi kwa Uongozi wa Shule hiyo ili kianze kutumika.

Afisa Uhusiano wa Taasisi ya It’s time to help Tanzania, Ndg. Mbwana Kitendo akizungumza kwenye makabidhiano ya mradi huo amesema, taasisi hiyo ina utaratibu wa kutoa misaada kwa jamii katika sekta za Afya, elimu na Sekta ya ustawi wa jamii ambapo pia hutoa misaada kwa vituo vinavyohudumia watoto wanaotoka katika mazingira magumu.

“Ni kiu yetu kuona tunaipunguzia jamii baadhi ya changamoto hasa zinazowakabili watoto katika kujenga Taifa la kesho imara, baada ya kupata taarifa kuwa wanafunzi takribani 320 wa Shule hii mpya ya Sekondari wana changamoto kubwa ya ukosefu wa maji, tuliona umuhimu wa kuja kuwasaidia kupata huduma ya maji hasa ikizingatiwa kuwa maji ni uhai na ni uhitaji muhimu kwa mwanadamu yeyote. Kutatua changamoto hii kwetu ni mafanikio makubwa kwani tunaamini sasa wanafunzi watasoma kwa amani bila kufikiri tena changamoto ya kukosa maji na hii itawaongezea utulivu na ubunifu katika masomo yao” Amesema Bw. Mbwana

Kaimu Mkurugenzi wa Halmashauri ya Wilaya ya Bagamoyo Bw. Julius Mwanganda ameishukuru taasisi ya hiyo kwa kuona uhitaji uliokuwepo Shuleni hapo na kuwa tayari kutoa msaada huo adhimu kwani ni ukweli usiopingika kuwa Shule hiyo ilikuwa na changamoto kubwa ya ukosefu wa maji, hali iliyowaletea usumbufu mkubwa na kuwaondolea utulivu wanafunzi hasa wa kike na si wanafunzi tu hata walimu kwani maji ni huduma muhimu na ya msingi kwa mwanadamu yeyote mahali popote, hivyo utatuzi wa changamoto hii utaleta ufanisi mkubwa kielimu na utendaji kazi kwa ujumla shuleni hapo.

Kwa upande wake Mkuu wa shule ya sekondari Mapinga, Bi. Agnes Mmbaga amesema awali walikuwa wakitumia maji toka katika kisima cha kuchimba kwa mkono kilichochimbwa na walimu pembezoni mwa Shule hiyo, ambacho hakikuwa na maji ya uhakika wala salama kiafya, hali hii ilipelekea kupoteza muda mwingi kutafuta maji badala ya kutumia muda huo kwenye masomo, hivyo mradi huo wa maji ni ukombozi kwa wanafunzi na walimu wa Shule hiyo huku akiahidi kuutunza mradi huo ili uendelee kutoa huduma hiyo muhimu kwa muda mrefu.

Bi. Mmbaga anaongeza, “Shule yetu hii ni mpya ndio imeanza kupokea wanafunzi wa kidato cha kwanza Mwezi Januari Mwaka huu, na kwa hakika bado ina chanagmoto nyingi ikiwemo upungufu wa vyumba vya madarasa, uzio, umeme, maabara, maktaba, matundu ya vyoo na Ofisi ya Walimu, hivyo nawaomba wadau wa elimu kufika katika Shule yetu na kutusaidia kutatua changamoto hizi ili kuboresha mazingira ya kujifunzia na kufundishia hali itakayoinua kiwango cha taaluma Shuleni hapo” Amesema Bi. Mmbaga.

Shule mpya ya Sekondari Mapinga, ni Shule Mpya ya Kata katika Halmashauri ya Wilaya ya Bagamoyo. Shule hii ilianza kujengwa mapema mwaka 2019 kwa nguvu za wananchi, Halmashauri na wadau wa maendeleo katika Kata hiyo na ilipata usajili Mwezi Januari mwaka huu ambapo baada ya usajili huo ilianza kupokea wanafunzi wa kidato cha kwanza kutoka katika Vitongoji vya Kata ya Mapinga na imekuwa msaada mkubwa kwa wanafunzi wa Kata hiyo ambao hapo awali walilazimika kutembea umbali mrefu kwenda kupata elimu ya Sekondari katika Shule za kata za jirani za Kerege na Kiromo.