WANANCHI BAGAMOYO WAHAMASISHWA KUFANYA USAFI WA MAZINGIRA KILA SIKU

Posted on: January 28th, 2019

Wananchi wa Halmashauri ya Wilaya ya Bagamoyo, hususani Wananchi wa Kata ya Dunda na Magomeni wamehamasishwa juu ya kujenga mazoea ya kufanya usafi wa mazingira yanayowazunguka mara kwa mara bila kungoja jumamosi ya mwisho wa mwezi ya usafi kama wanavyofanya sasa.

Uhamasishaji huo umefanyika siku ya jumamosi ya tarehe 26 Januari, 2019 kupitia kongamano maalum la usafi wa mazingira lililofanyika katika Soko la Magomeni lililopo Kata ya Nia njema na kuhudhuriwa na Wananchi takribani 200 wa Kata Magomeni na Kata jirani za Dunda, Kisutu na Nia njema.

Kongamano hilo limefanyika chini ya udhamini wa shirika liitwalo CVM (Communita Volontari per il Mondo) Shirika lisilo la Kiserikali linalotekeleza miradi ya maendeleo ya jamii Nchini Tanzania. Shirika la CVM Wilayani Bagamoyo linatekeleza mradi uitwao vijana ni Taifa la kesho wenye lengo la kuboresha fursa za kiuchumi na kazi kwa vijana, kukuza upatikanaji wa elimu kwa Wasichana walio katika mazingira magumu zaidi pamoja na kukuza ufahamu miongoni mwa vijana kuhusu masuala ya vijana na jinsia.

Akizungumza na Wananchi waliojitokeza kwenye kongamano hilo, Kaimu Mkuu wa Idara ya Usafi na mazingira wa Halmashauri ya Wilaya ya Bagamoyo Bw. Moses Mgalla amesema usafi wa mazingira ni jukumu la msingi kila Mwananchi, kwani usafi ni Afya.

“Niwahamasishe Wananchi wote wa Bagamoyo kuona kuwa usafi ni jukumu la msingi, kila mwananchi ahamasike na ajenge tabia ya kufanya usafi wa mazingira yanayomzunguka kila siku hasa kipindi hiki tunachoelekea mvua za masika ambapo nyasi huota kwa wingi kuzunguka makazi yetu, majani hayo yafyekwe ama kulimwa na mazingira yanayotuzunguka yawe safi wakati wote” Amesema Bw. Mgalla.

Anaongeza kusema kuwa katika zama hizi za sasa ni aibu kwa Mwananchi awaye yeyote kutokuwa na choo bora, hivyo akatumia fursa hiyo kuwahamasisha Wananchi juu ya ujenzi wa vyoo bora vya gharama nafuu na kueleza kwamba choo kisicho salama kwa matumizi ya Binadamu ni hatari kwa afya ya mtumiaji na jamii kwa ujumla na kuwaasa Wananchi kuhakikisha wananawa mikono kwa kutumia sabuni kila mara wanapotoka chooni na kabla ya kula.

Naye Mwenyekiti wa Serikali ya Kitongoji cha Magomeni B, Bw. Mwinyi VuguVugu Hamidu amelishukuru shirika la CVM na Wataalam wa Usafi wa mazingira toka Halmashauri kwa kuitembelea Kata ya Magomeni na kuwapatia elimu hiyo ya usafi wa mazingira ambayo itawafaa sana, ili waishi katika mazingira safi siku zote na kuepukana na magonjwa ya mlipuko yanayosababishwa na kuishi kwenye mazingira machafu.

Wakati huo huo, Usafi wa mazingira unaofanyika kila jumamosi ya mwisho wa mwezi, umefanyika kwa ufanisi katika Halmashauri ya Wilaya ya Bagamoyo huku maeneo mengi yakionekana safi mara baada ya kukamilika kwa usafi huo, zoezi lililoonesha mwitikio mkubwa toka kwa Wananchi na jamii ya Wanabagamoyo kwa ujumla.