WARAIBU WA DAWA ZA KULEVYA KUANZA KUPATIWA MATIBABU KATIKA HOSPITALI YA WILAYA BAGAMOYO

Posted on: December 13th, 2019

Waraibu wa madawa ya kulevya katika Halmashauri ya Wilaya ya Bagamoyo, wataanza kupatiwa matibabu bure yatakayowasaidia kuachana na matumizi ya dawa za kulevya, matibabu yanayotambulika kama methadone

Matibabu haya yataanza kutolewa rasmi kuanzia tarehe 16/12/2019, saa 11:00 Alfajiri katika jengo jipya la kliniki ya methadone lililojengwa ndani ya Hospitali ya Wilaya ya Bagamoyo na yatatolewa bure kwa waraibu walioathirika na matumizi ya dawa za kulevya walio tayari kuachana na matumizi ya dawa za hizo.

Kuelekea kuanza utoaji wa huduma hii mnamo tarehe 16/12/2019, Mkuu wa Wilaya ya Bagamoyo Mhe. Zainab Kawawa amefanya uhamasishaji maalum kwa waraibu na jamii nzima ya wakazi wa Bagamoyo, uhamasishaji ambao umefanyika siku ya tarehe 12/12/2019, kwa kufanya mkutano katika eneo la pwani (beach) zilipokuwa Ofisi za Mamlaka ya Mapato Nchini (TRA), eneo hilo hukaliwa zaidi na vijana walioathirika na matumizi ya madawa ya kulevya, ambapo Mhe. Mkuu wa Wilaya ametumia fursa hiyo kuzungumza nao na kuwapa hamasa ya kwenda kupatiwa matibabu ya methadone kwenye kliniki mpya ya methadone katika Hospitali ya Wilaya ya Bagamoyo.

“Tumekuja na mpango mzuri wa Serikali wa kuwanusuru toka katika matumizi ya dawa za kulevya, tumefanya juhudi kubwa kutafuta wadau na kuwaomba watusaidie kupata kliniki hii ya methadone katika Wilaya yetu ambayo ina waathirika wengi vijana wa dawa za kulevya, na nina Imani mtaitumia fursa hii kuhamasishana wenyewe kwa wenyewe kwenda kupata matibabu ya methadone yatakayowasaidia kuondokana na matumizi ya dawa za kulevya, na kujirejeshea heshima na uaminifu mlioupoteza katika jamii” Amesema Mhe. Zainab Kawawa

Ameongeza, Vijana ni nguvu kazi ya Taifa, nguvu kazi hii inapopotea kwa vijana kujihusisha na matumizi ya dawa za kulevya, Taifa linachelewa kupiga hatua za maendeleo, jitokezeni kwa wingi katika kliniki hii ili mpatiwe matibabu ili mrejee kuwa vijana wenye utashi, akili timamu na wenye nguvu, kwani Taifa linawategemea na tunahitaji jamii huru na salama, ambayo tutashirikiana kwa pamoja kuiletea Nchi yetu maendeleo na niwatie moyo kuwa inawezekana kabisa kuachana na matumizi ya dawa za kulevya.

Dr. Eric Aris ni Kaimu Mkurugenzi wa Shirika la Kimarekani la MDH (Management and Development for Health) lililofadhili ujenzi wa kiliniki ya methadone katika Halmashauri ya Wilaya ya Bagamoyo, kwa kushirikiana na Wizara ya Afya, ametumia fursa hiyo kuwahamsisha Vijana kuhakikisha wanaitumia kliniki ya methadone kwa tija kwa kuweka nia ya kuchukia kuwa mwathirika wa dawa za kulevya na kuamua kuacha kwa kuanza matibabu ya methadone

Mmoja wa waraibu aliyepata matibabu ya methadone na kupona kutoka Kata ya Zinga, Bw. Rashid Abdallah (35), akitoa ushuhuda wake katika hadhira hiyo amesema, aliingia katika matumizi ya dawa za kulevya kwa kushawishiwa na kijana mwenzake wakati akifanya kazi za ukondakta wa daladala jijini Dar Es Salaam, huku mwenzake huyo akiwa ni dereva wa dala dala aliyokuwa akifanyia kazi

Anaongeza kusema, Nilipoteza heshima na uaminifu kwa jamii yangu hasa ndugu zangu kwa kuwa matumizi ya dawa za kulevya yalinipelekea kuwa mwizi kila nilipoingia nilihakikisha natoka na kitu ambacho ningekiuza kujipatia fedha za kununulia dawa za kulevya, jamii yangu ilinitenga na kuninyanyapaa, na nilipochoshwa na hali hiyo, niliamua kuanza matibabu ya methadone katika Hospitali ya Taifa ya Muhimbili, nilikuwa natoka Zinga kwenda Muhimbili kila siku kufuata matibabu ya methadone, na hii ilikuwa gharama kubwa kwangu.

“Wazazi wa Vijana wa Bagamoyo shirikianeni na Vijana wenu, watienu moyo na wahamasisheni kwenda kupata matibabu ya methadone ili waondokane na uraibu kama nilivyofanya mimi na sasa nimekuwa mtu mwenye heshima na ninaeaminiwa tena jamii na familia yangu, Vijana wa Bagamoyo tumieni fursa hii iliyoletwa karibu nanyi, si kama mimi nilitumia gharama kubwa kuifata huduma ya methadone Hospitali ya Taifa Muhimbili kila siku, nawasihi Vijana wenzangu kutokuwa na shaka na matibabu ya methadone, kwani ni matibabu salama na hayana madhara yoyote kwa mraibu aliyeamua kupata matibabu hayo” Ameshuhudia  Bw. Rashid Abdallah

Nae mratibu wa Afya ya Akili na tiba ya dawa kulevya Bagamoyo Bi. Husna Kipilipili akizungumza katika uhamasishaji huo amesema, Methadone ni dawa inayotolewa kumsaidia mraibu aliyeathirika na matumizi ya dawa za kulevya aina ya heroin, matibabu ya methadone humfanya mraibu aache matumizi ya dawa za kulevya bila kupata arosto “withdrawal” na hivyo kuendelea na maisha yake kama kawaida bila matumizi ya dawa za kulevya “heroin”, na dawa hii hutolewa mara moja kwa siku na ipo katika mfumo wa kimiminika yaani “syrup” pia ni dawa ambayo imethibitishwa kisayansi kuwa haina madhara kwa matumizi ya binadamu.