WAZIRI WA TAMISEMI AKABIDHIWA MRADI WA UKARABATI MAJENGO SHULE YA MSINGI KAOLE.

Posted on: July 18th, 2021

Waziri wa Nchi Ofisi ya Raisi Tamisemi Ummy Mwalimu amepongeza juhudi zilizofanywa na Taasisi isiyo ya kiserikali ya Lady Fatemah Trust (UK) kwa kuafanya ukarabati wa vyumba 7 vya madarasa,Ofisi ya Mkuu wa shule ,Ofisi ya walimu na ujenzi wa matundu ya choo 2 ya vyoo vya walimu shule  ya msingi Kaole .

Akizungumza wakati wa kukabidhiwa mradi huo amesema kuwa anatambua na anathamini kazi kubwa iliyofanywa kwani wao kama serikali hawatoweza kufanya kila kitu bila kushirikisha wadau mbalimbali wa maendeleo.

‘’Natambua sana kazi kubwa mliyoifanya na ndio maana leo hii nimekuja hapa kwa kuthamini kile ambacho mmekifanya mama keki pamoja na mzee wangu Anuari  ambao wamekuwa wakifanya kazi hizi za jamii kwa Zaidi ya miaka 34 sasa ‘ Waziri Ummy Mwalimu.

Pia Mhe. Ummy  amemshukuru Mbunge wa jimbo la Bagamoyo Mhe Muharami Mkenge kwa kuwezesha kutafuta wadau na kusaidia kufanyika kwa ukarabati wa shule ya msingi Kaole ‘’tunakushukuru sana mhe mbunge na mkurugenzi wa Halmahsuri kwa kufanikisha kuwapata wadau hawa..

Mhe. Waziri pia amevutiwa na hali iliyopo ya majengo kwa ubunifu iliofanyika kwani umeleta taswira nzuri pia itasaidia kupitia ukarabati huo kudumu kwa muda mrefu kwani wametumia ubunifu mzuri wa kutopaka rangi na kuamua kupiga chooping.‘’Kwa hili nipongeze sana na nimepata ushahidi wa kwenda kumuonesha waziri ujenzi na uchukuzi kwamba sasa tutoe huo muongozo mpya wa majengo ya serikali’’amesema Waziri Ummy 

Aidha Mhe. Ummy ametoa wito kwa wadau kushirikiana na serikali kukarabati shule zote ambazo ni kongwe na zina miundombinu ambayo sio rafiki huku pia akisema kupitia Tamisemi tayari swala la ukarabati shule hizo tayari wameliweka kipaombele na tayari wamekwisha anza kukarabati shule kongwe za sekondari na zoezi ilo likimalizika wataanza ukarabati wa shule kongwe za msingi takribani 2100 ambazo zimejengwa kabla ya uhuru.

Sanjari na hayo Mhe. Ummy amesisitiza kuwa upo uhaba wa madarasa katika shule za msingi na sekondari hivyo wanaomba wadau kuendelea kuiunga mkono serikali ili kuhakikisha kuwa wanatatua tatizo lililopo la uhaba wa vyumba hivyo vya madarasa huku kwa mkoa wa Pwani kuna uhaba wa vyumba 4300 na kusema kuwa maelekezo ni kuhakikisha kupitia Wenyeviti wa Halmashauri ,Wakurugenzi  wa Halmashauri wanapeleka asilimia 40 ya fedha wanazokusanywa kwa mapato ya ndani ya Halmashauri kutatua kero za wananchi katika Halmashauri zetu.

Pia amewaomba Wenyeviti wa Halmashauri kuweka swala hilo kama ni kipaombele na kusema kuwa wataichambua hiyo aslimia 40 iliyopelekwa kwenye maendeleo imekwenda kufanya jambo lipi ambalo limegusa wananchi wa Bagamoyo ‘’maendeleo yangu mimi ni kanijengee darasa,kanifanyie ukarabati wa madarasa,kaninunulie madawati watoto wangu wasikae chini,kanijengee vyoo hayo ndio maendeleo kajenge zahanati,nunua vifaa tiba jenga nyumba za walimu kwahiyo nadhani wakurugenzi mmenisikia amesema Waziri Ummy.

Mhe. Ummy amesema kuwa wapo katika mpango wa kujenga vyumba vya madarasa shule ya msingi na sekondari  Zaidi ya elfu kumi  katika Bajeti hii ya mwaka 2021/22 ili kuweza kuwatoa watoto chini ya mti na kwenye misongamano, na kuwatoa watoto kwenye darasa bovu Zaidi ya watoto laki tano.

Halmashauri ya Bagamoyo kupitia ofisi ya mbunge  ilipata ufadhili wa ukarabati wa vyumba 7 vya madarasa,ofisi ya mwalimu mkuu,ofisi ya walimu,na ujenzi wa matundu ya 2 ya vyoo vya walimu kutoka taasisi isiyo ya kiserikali ya ‘’LADY FATEMAH TRUST ( UK).ambapo ukarabati huo umetumia kiasi cha shilingi Milioni 73.