ZOEZI LA USAFI WA MAZINGIRA JUMAMOSI YA MWISHO WA MWEZI LAKAMILIKA KWA UFANISI BAGAMOYO

Posted on: August 25th, 2018

Wananchi, timu ya Wataalamu ya Halmashauri na Watumishi wa Halmashauri ya Wilaya ya Bagamoyo leo jumamosi ya tarehe 25 Agosti, 2018 wameshiriki katika zoezi kufanya la usafi wa mazingira yanayowazunguka ikiwa ni pamoja na Ofisi za Halmashauri, Taasisi za Serikali na binafsi, stendi ya dala dala ya Bagamoyo, masoko, barabara na Hospitali ya Wilaya ya Bagamoyo.
Zoezi hili maalumu la usafi ni katika kutekeleza Agizo la Muheshimiwa Rais wa Jamuhuri ya Muungano wa Tanzania, John Pombe Joseph Magufuli alilolitoa tarehe 9 Desemba, 2015 la kuhakikisha kila Mwananchi anashiriki katika usafi wa mazingira wa eneo analoishi au kufanyia biashara.
Aidha, zoezi hili la usafi wa mazingira limefanyika kuanzia saa moja kamili asubuhi hadi saa nne kamili asubuhi huku maeneo mengi ya Kata ya Magomeni na Kata ya Dunda yakionekana yakiwa safi zaidi mara baada ya zoezi hilo la kufanya usafi.
Nae Kaimu Afisa Usafi na Mazingira wa Halmashauri ya Wilaya ya Bagamoyo, Bw. Cleophace Murugwa akizungumza baada ya kukamilika kwa zoezi hilo amesema, “mbali ya kwamba kufanya usafi kunafanya mazingira yapendeze na pia kuondoa magonjwa yanayosababishwa na kuzungukwa na mazingira machafu, lakini pia zoezi la kufanya usafi kwa pamoja linajenga umoja na mshikamano na kuondoa matabaka katika jamii yetu”
Bw. Murugwa pia akatoa wito kwa Wana bagamoyo kujitokeza kufanya usafi kila inapofika jumamosi ya Mwisho wa Mwezi bila kutegea, wala kujali uwezo wa mtu, hadhi ya mtu, cheo au nafasi ya mtu katika jamii, na kuhamasisha viongozi wa Halmashauri hususani Waheshimiwa Madiwani kuwa mfano kwa kujitokeza kufanya usafi pamoja na Wananchi wao.